Aleqa Hammond siulittaasup tulliatut ingerlaannassaaq

Socialdemokratimmi aalajangerput Siumumi ilaasortaasimasoq Kalaallit Nunaannut tunngasunut ataatsimiititaliami siulittaasup tulliatut ingerlaannassasoq. Allattaa tusagassiorfinnut nalunaaruteqarluni taama allappoq.

Aamma Nunani Avannarlerni Siunnersuisoqatigiinni sinniisuuffini aammalu Issittoq pillugu suleqatigiissitami inissisimaffigisani tigummiinnartussanngorpai.

Taamaattorli inatsisit pillugit ataatsimiititaliami, nunanut allanut ataatsimiititaliami aammalu illersornissamut ataatsimiititaliami ilaasortaaffini annaavai. Nunarpulli pillugu oqaluuserisassaqartillugu Socialdemokratit issiavissaat atorsinnaajuaannartussanngorlugit Socialdemokratit isumaqatigiissuteqarfigai.

Aamma atuaruk Qaasuitsumi Siumukkormiut Aleqa Hammond tunuarniuteqqaqugaat

Aleqa Hammondip tusagassiorfinnut nalunaarummi oqaatigaa Socialdemokratinik isumaqatigiissuteqarnini nuannaarutigalugu. Taakkumi Hammondip Siumumit ilaasortaajunnaarsinneqarnerata kingorna Folketingimi gruppiminnit sapaatit-akunnerata siuliani ilaasortaajunnaarsippaat.

- Isumaqatigiinninniareerlunga attaviitsutut Folketingimi sulinissanni inissisimaffissara sunniuteqarluarnissamut tunngaviliisoq nuannaarutigeqaara. Nunatta naalagaaffinngoriartornissaanut sulinera erseqqissumik ingerlateqqissavara maannamullu inissisimaffiup killiffia iluarisimaaqaara, Hammond allappoq.

Aleqa Hammond malittarisassat unioqqutillugit Folketingimit kreditkorterisaminik 13.000 koruunit nalinginut imminut pisiortorsimanera qulaajaaffigineqareersoq assoralisimaangaatsiarpoq. Tamatuma malitsigisaanik Siumumit qinigassinneqarpoq Folketingimit tunuarniuteqassasoq imaluunniit partiiminit ilaasortaajunnaarsinneqarluni. Aleqa Hammondip Folketingimi ilaasortaaginnarnissani toqqarpaa.

Tamatuma kingorna Socialdemokratit Folketingimi gruppiannit, Siumup Danmarkimi suleqatigisaanit, ilaasortaajunnaarsinneqarpoq.