Politikki

Aleqa Hammond London Miningimik ataatsimeeqateqarpoq

London Miningip Tuluit Nunaani pisortaanera Graeme Hossie, Naalakkersuisut siulittaasuannik Aleqa Hammondimik, Aningaasaqarnermut naalakkersuisumik Vittus Qujaukitsumik, Inuussutissarsiornermullu Aatsitassarsiornermullu naalakkersuisumik Jens-Erik Kirkegaardimik, Isukasiani suliassap ingerlanera pillugu ippassaq tallimanngornermi ataatsimeeqateqarpoq.

Allattoq Mads Lynge

apriilip 22-at 2013 06:16

Naalakkersuisunngoqqammersut London Miningillu akornanni suleqatigiinneq ingerlariaqqissimasoq, tamanna takussutissarigunarpaa. Jens-Erik Kirkegaardimmi ataatsimiinneq ingerlalluarsimasutut nalilerpaa:

- Pilersitsiviusumik ataatsimeeqatigiinneq neriulluarnartumik anersaaqartumik ingerlanneqarpoq, Jens-Erik Kirkegaard oqarpoq.

Isukasiani suliaq pillugu Naalakkersuisut isumaat ataatsimiinermi saqqummiunneqartoq, taassuma aamma oqaluttuaraa, killiliussatullu aalajangersakkat iluanni suliaq ineriartortinneqassasoq aamma isumaqatigiissutigineqarpoq.

Ataatsimiinneq pissarsiaqarfiulluartoq, London Miningip pisortaanerata aamma oqaatigaa:

- Naalakkersuisut oqaloqatigilluarpavut, akuersissummillu neriuutigisatsituut tunineqassagutta, suliamut atatillugu aningaasaliisinnaalernissaq suliassarilissavarput. Tamannami aatsaat qulaakkeerutsigu sanaartorneq aallartissinnaalissagatsigu, Graeme Hossie, Sermitsiaq.AG-mut oqarpoq.

Sanaartornerit qaqugu aallartissinnaassanersut, Graeme Hossiep eqqoriaruminaatsippaa.

Aleqa Hammond London Miningimik ataatsimeeqateqarpoq

Aamma atuaruk