VIDEO Aleqa Hammond: Ataatsimiititalip suliaata inernera takussallugu ersissutigaat
Inuiaqatigiinni eqqartuunneqartutullusooq pineqarnini pissutigalugu Aleqa Hammond Siumumi siulittaasutut tunuarnerarpoq.
- Isumaqarama Kukkunersiuinermut ataatsimiititaliap suliaata naammassinissaata tungaanut utaqqisinnaanngitsutullusooq eqqartuussineq angisooq inuiaqatigiinni atuuttoq uanga siuttuutillunga partiinnut atuutsikkusunngilara. Akisussaaffik tamakkiisoq tigummiarpara, aamma Kukkunersiuinermut ataatsimiititaliap naammassinissaanut ilerasuuteqanngilanga, eqqortoq saqqummiunneqassammat. Isumaqarpungalu eqqissisimasumik sulititsisinnaanngippat, iluaqutaasinnaappat siulittaasutut tunuartariaqarnera, taanna pissaaq. Uanga pingaarnerunnginnama, inuiaqatigiinni suliassavut oqimaattut pingaarnerummata.
Kukkunersiuinermut ataatsimiititaliap inerniliutigisassaa ersissutigineqarnerarpaa
Siumup siulittaasuatut tunuartoq isumaqarpoq Kukkunersiuinermut ataatsimiititaliap suliaata inernera ersissutigineqartoq.
- Naalakkersuisooqatigiinni aammalu partiit illuatungiliuttut arlaannaataluunniit Kukkunersiuinermut ataatsimiititaliap sulinerata inernera takorusunngilaat. Allaanngilaq ersissutigigaat takussallugu. Uanga isumaqarpunga Siumup nukittunermini takutikkaa. Kisiartaalluni sorsuutigivaa Kukkunersiuinermut ataatsimiititaliaq naammassisariaqartoq aammalu piffissaqartinneqartariaqartoq. Isumaqarpunga tamanna inuit eqqarsaatigissagaat.