FOLKETINGIMI Aleqa Aajalu ima sulisarput

Nunatta Folketingimut ilaasortaatitaasa suliumatussusaat assigiinngillat. Ilaasortammi ministerinut apeqquteqaatai qimerlualaaraanni assigiinngissut tassani takuneqarsinnaavoq.
Assi © : KNR
juulip 05-at 2016 07:00
Nutserisoq Mads Lynge

 

Kalaallit Nunaata Folketingimut ilaasortaatitai Folketingip Kalaallit Nunaannut tunngasunut ataatsimiititaliaata siulittaasuanit Marcus Knuthimit, Venstremeersumit, nersualaarneqarput.

- Aajap Aleqallu suliaat immikkuullarissuupput. Siulittaasutut tamakku nuannareqaakka, Marcus Knuth oqarpoq.

IA amerlanerusunik apeqquteqartoq

Folketingip Kalaallit Nunaannut tunngasunut ataatsimiititaliaanni ilaasortat ukiup ataatsip kingulliup ingerlaneranni apeqquteqaatai katillutik 87-iusimapput, Aaja Chemnitz Larsenillu Aleqa Hammondillu apeqquteqaatigisimasaat taakkunannga 51-iusimallutik.

Apeqquteqaatigisimasaasa amerlanersaat, 47-t,  Aaja Chemnitz Larsenimit apeqquteqaatigineqarsimapput.

Folketingimilu ukiup kingulliup ingerlanerani sulisimanini ulapinnarsimasutut nammineq aamma nalilerpaa:

- Imminut malunnartinniarnikooqaanga. Partiinillu saamerlernit talerperlerniillu nersualaarneqartarlunga, suliakkalu ataqqineqartutut misigaakka, Aaja Chemnitz Larsen oqarpoq.

Inuit Ataqatigiit ministerimik aamma isumasioqatigiissitsisimapput, soorlu aamma pingasoriarlutik tusarniaatitsisoqarsimasut.

Aleqa misilittagertunerusoq

Siumut sinnerlugu Folketingimut ilaasortaq Aleqa Hammond ministerinut katillugit tallimanik Kalaallit Nunaannut tunngasunut ataatsimiititaliaq aqqutigalugu apeqquteqaateqarsimavoq, soorlu aamma ataasiarluni ministerimik isumasioqatigiissitsisimasoq.

Apeqquteqaatit isumasioqatigiissitsinerillu amerlanerusimannginnerat pissutissaqartoq Aleqa Hammondip oqaatigaa:

- Kalaallit Nunaannit ilaasortaqatinnut naleqqiullugu apeqquteqaateqannginneruvunga. Qinikkatut misilittagaqarnerunera immaqa pissutaaqataasinnaavoq. Kalaallit Nunaanni qinikkatut misilittagaqarluarnera matumani pissutaagunarluni, Nunatsinnut tunngasunut pingaarutillit misilittagaqarluarfigalugit, Kalaallit Nunaata Danmarkillu akornanni isumaqatigiiniutigineqartussatut pingaaruteqartut misilittagaqarluarfigalugit, Aleqa Hammond oqarpoq.

Inatsisit Danmarkip Kalaallit Nunaat sinnerlugu akisussaaffigisai katillugit arfineq-marluk Folketingimi ukiup kingulliup ingerlanerani akuersissutigineqarput.

Takkunannga amerlanerit Inatsisartut kissaatigisai aallaavigalugit inatsisaapput.