Akuersissuteqarani kanalinik Nunatsinni nioqquteqartoq
Orango TV qaammammut 259 koruuninik akiliillunik kanaalinik nittartakkakkut isiginnaaneqarsinnaasunik 200-t sinnilinnik neqerooruteqarpoq.
Orango TV, 2016-imili danskit tusagassiorfiini allaaserineqallattaalersoq, Nunatsinni innuttaasunut akikinaaralaluni isiginnaagassaqarusuttunut saffiginnittumik kalaallisut oqaasertalimmik Facebookimi takussaaleraluarpoq.
Canal Digitalimili tuniniaanermi pisortap, Henrik Thomsenip ilaatigut Nunatsinnik sullissinermik akisussaasup, KNR-imut oqaatigaa Orango TV tassaasoq akuersissuteqarani unioqqutitsilluni kanaalinik neqerooruteqartartoq.
- Orango TV unioqqutitsisuuvoq kanalitsinnik neqerooruteqarnissamik uatsinnit pisinnaatitaaffeqanngitsoq, Henrik Thomsen KNR-imut oqarpoq.
Taassuma aamma oqaatigaa, kanaalinik unioqqutitsillutik neqerooruteqartartut nunani allaniikkajuttartut paasisaannginnerminnillu matusarlutik.
Orango TV Grønland marlunngornermi Facebookimini allappoq, Facebookimi qupperneq ullup ingerlanerani matussasoq. Taamallumi pisoqarpoq.
Orango TV-meersumik apersuiniarsarigaluarpugut iluatsinngilarlli. KNR-illi Orango TV-ip nittartagaatigut attavigimmagu isiginnaagassanik neqerooruteqarnertik unioqqutitsinerunngitsoq sulisup oqaatigaa.
Nordic Content Protectionilli, unioqqutitsilluni kanaalinik neqerooruteqartarnermik akiuiniarnermik suliallip, KNR-imut uppernarsarpaa Orango TV tassaasoq unioqqutitsilluni isiginnaagassanik tuniniaasartoq.