Akiuussutissaq AstraZeneca Vaxzevriamik ateqalersoq

AstraZenecamit akiuussutissaq Vaxzevriamik ateqarpoq.

Tamanna Europami nakorsaatinut aqutsisoqarfiup (EMA-p) nittartagaani akiuussutissamut tunngasunut quppernerani allassimavoq.

Akiuussutissaq siullermik ”COVID-19 Vaccine AstraZeneca”-mik ateqaraluarpoq.

Ekstra Bladet naapertorlugu Peqqinnissamut ministereqarfiup, Peqqinnissamut aqutsisoqarfiup, Statens Serum Instituttip Nakorsaateqarnermut aqutsisoqarfiulluunniit nakorsaatip nutaamik ateqalernera ilisimasimanngilaat.

Tamanna naak akiuussutissap aqqata allanngortinneqarnissaa EMA-mit sapaatip akunnerata siuliani sisamanngornermi akuerineqaraluartoq.

Akiuussutissaq taanna kapitissimasut ilaasa nalinginnaanngitsumik ilaatigut taqqamik milittoornermik kinguneqartitsinerat pissutigalugu Danmarkimi atorunnaarallartinneqarpoq.

AAMMA ATUARUK Norskit AstraZenecap akiuussutissaliaanik atuiunnaarallarnertik sivitsoraat

Nakorsiartarfimmi misilittakkat Nakorsaateqarnermut Aqutsisoqarfiup paasisai tassaapput akiuussutissamik kapitissimasut ilaat taqqamik milittoornerit qassiiusut saniatigut aanaarneqarlutillu aavisa akuanni issorsaataasoq annikitsoq. Aap akua issorsaataasoq aammut issorsinnaalersitsisarpoq.

Akiuussutissap ilungersunartumillu napparsimanerup akornanni ataqatigiittoqarnersoq uppernarsarneqanngilaq. Tamanna nunat qassiiusut matumani Danmark ilanngullugu misissuiffigileruttorpaat.

Taqqatigut milittoornerit akiuussutissallu akornanni ataqatigiittoqarnera allanngortitassaanngikkaluarpallaalluunnit akiuussutissap iluaqutissartaa akiuussutissap aalerinartuatut naleqartigisoq EMA-p oqaatiginikuuuaa.

AAMMA ATUARUK AstraZenecap akiuussutissaliaanik atuiunnaarneq akiuussusiinermik kinguaattoortitsisinnaasoq

Norskilli ilisimatuuisa nakorsaatip eqqumiitsumillu napparsimalernerup akornanni atassuteqarneq ersarissumik paasisimasoraat.

- Timip nappaammut akiuunnissamut qisuariaateqarneranut akiuussutissaanngitsumik allamik nassuiaatissaqanngilaq, Oslomi Rikshospitalimi nakorsaaneq professorilu, Pål Andre Holme marsip ulluisa 18-ianni oqarpoq.

AstraZenecap avammut attaveqarnermut pisortaa, Christina Hägerstrand Ritzau-ip oqaloqatigaa, taassumalu akiuussutissaq sooq nutaamik ateqalernersoq oqaatigerusunngilaa, taamaakkaluartorli nakorsaatit nunani assigiinngitsuni nutaamik ateqalertarnerat nalinginnaasuusoq paasissutissiissutigalugu.