Akiuussusiiartortut nunatta kujataanukalersut

Akiuussusiiartortut covid-19-imut akiuussutissamik neqerooriartorlutik nunatta kujataanukaqqipput.

Peqqinnissaqarfik angalanerminni tamatumuuna sumiiffinnut assigiinngitsunut 14-inut ulluni arfineq pingasuni angalassapput.

Innuttaasut siullermeertumik kapitissimasut sulilu kapitissimanngitsut akiuussutissamik kapitissinnaapput. Akiuussusiiartortummi qaammatip siuliani kujataaniimmata amerlasuut itigartitsisimapput.

Namminersorlutik Oqartussat tusagassiuutinut nalunaarummi allapput.

AAMMA ATUARUK Kujataani akiuussusersuinissaq sapaatit akunnerata tulliani aallartissaaq

Kommune Kujallermi innuttaasut 2.351-it siullermeertumik kapitissimasut nakorsaaneqarfiup nittartagaani allassimavoq. Taakkunannga 534-t aappassaaneertumik kapitereersimapput. Akiuussutissammi sunniuteqarnissaa qulakkeerniarlugu aappassaaneertumik kapitittoqarnissaa nakorsaaneqarfiup kaammattuutigaa.

Naalakkersuisut nakorsaanerullu nunatta aggustimi septembarimiluunniit ammavinnissaa anguniarlugu pilersaarutigaat.

Naalakkersuisut ammaavikkusulernissaanut innuttaasut 18-ileereersimasut 75 procentii akiuussutissamik kapitereersimapput.

Maannamullu 7,65 procentit aappassaaneertumik akiuussutissamik kapitissimallutik, 13,1 procentillu siullermeertumik kapitereersimallutik.

Modernamit akiuussutissaq

Innuttaasut 18-ileereersimasut akiuussutissamik kapitinnissamut neqeroorfigineqarnerminni akuerseqqullugit kaammattorneqartut, Namminersorlutik Oqartussat allapput. Kisianni naartusut milutsitsisullu kapitinnissamut maannarpiaq neqeroorfigineqarsinnaanngillat, akiuussutissat taakkununnga akuerisaanngimmata.

- Akiuussutissaq atorneqartoq Modernameersuuvoq. Akiuussutissamik kapitittut covid-19-imik napparsimarujussualernissamut pitsaasumik illersorneqalertussaapput. Tuniluuttoqalernissaa pinngitsoortinniarlugu sapinngisamik amerlanerpaat akiuussutissanik kapitinnissaat pingaaruteqarpoq, Namminersorlutik Oqartussat allapput.

AAMMA ATUARUK Nakorsaaneq: Tusatsiakkanik eqqunngitsunik siammarteriunnaarlusi

- Nunami isorartuumi aammalu najugaqarfinni avinngarusimasuni sapinngisamik amerlanerpaat kapitinnissaat annertuumik aaqqissuunneqartariaqarpoq, taamaattumillu akiuussutissanik kapuisut najuunnerini innuttaasut akiuussutissamik kapitinnissamut akuerseqqullugit kajumissaarneqarput.

Corona pillugu allattoqarfiup pilersaarummi allanngortoqassappat nittartagartik nunatta kujataani innuttaasunit nakkutigineqarnissaa kaammattuutigaa.

Akiuussusersuinissamut pilersaarut aana:

• Arsuk - Ataasinngorneq maajip 10-at. Nalunaaqutaq 8-12.
• Qassimiut - Ataasinngorneq maajip 10-at. Nalunaaqutaq 19-22.
• Igaliko - Marlunngorneq maajip 11-at. Nalunaaqutaq 8-11.
• Qassiarsuk - Marlunngorneq maajip 11-at. Nalunaaqutaq 11.30-14.30.
• Narsarsuaq - Marlunngorneq maajip 11-at. Nalunaaqutaq 15-19.
• Tasiusaq - Pingasunngorneq maajip 12-iat. Nalunaaqutaq 8-11.
• Narsarmijt - Pingasunngorneq maajip 12-iat. Nalunaaqutaq 14-17.
• Aappilattoq - Pingasunngorneq maajip 12-iat. Nalunaaqutaq 19-23.
• Nanortalik - Sisamanngorneq maajip 13-iat. Nalunaaqutaq 8.
• Nanortalik - Tallimanngorneq maajip 14-iat. Nalunaaqutaq 16.
• Alluitsup Paa - Arfininngorneq maajip 15-iat. Nalunaaqutaq 8-13.
• Ammassivik - Arfininngorneq maajip 15-iat. Nalunaaqutaq 18-22.
• Saarloq - Sapaat maajip 16-iat. Nalunaaqutaq 8-10.
• Eqalugaarsuit - Sapaat maajip 16-iat. Nalunaaqutaq 13-17.
• Narsaq - Ataasinngorneq maajip 17-iat. Nalunaaqutaq 8.
• Narsaq - Marlunngorneq maajip 18-iat. Nalunaaqutaq 17.00 tikillugu.