Conny akiuussuserneqanngilaq: Immikkoortitaasutut misigisimavoq
Nuummiu 46-nik ukiulik, Conny Rasmussen, issanngusarnini peqqutigalugu akiuussusitissamik kapitinnikuunngilaq.
Akiuussuserneqarnikuunnginnamili inuiaqatigiinnit ajornerusutut misigisimasarpoq, oqartussammi akiuussusersimasut akiuussuserneqarsimanngitsullu immikkut killilersuuteqartippaat.
- Soorunami pikkunarpallaanngilaq nuannerpallaanngilaq uangalluni kapitinnikuunani. Taamanikkut killilersuinerit paasinarput, kisianni massakkut ukiut marluk qaangiutereerput, takusinnaalereerparput sumut ingerlanersoq, taamaattumik uaguulluni kapitinneqanngitsuulluni ullut ilaanni ilungersunartarput, taamatut killilersuinerit atussallugit.
AAMMA ATUARUK Nunatsinnut angalasut misissortittarunnaartut sumiiffinnilu killilersuutit nuna tamakkerlugu atuutilersut
Conny Rasmussen marlunnik meeraqarpoq. Ernini arsarluni sungiusariaangat ilagerusuttaraluarpaa, timersortarfimmullu iseqqusaaneq ajorpoq akiuussuserneqarnikuunnginnami.
Nunatsinni killilersuinerit - naatsumik
- Nunatsinni tamarmi tamanit iserfigineqarsinnaasuni coronapas atuutissaaq. Tassa neriniartarfinni, imerniartarfinni, filmertarfinni, katersortarfinnilu assigisaanilu.
Ukununnga isissaguit qanermut assiaquteqassaatit
- Tamanit iserfigineqarsinnaasuni (pisiniarfinni, oqaluffinni, atuakkanik atorniartarfinni assigisaanilu).
- Bussinut taxanullu ilaanermi.
-
Nunatsinni tamarmi neriniartarfiit imerniartarfiillu isersinnaasut, qatserisartut amerlassusaasinnaasutut akuerisaasa affaannaat isertissinnaassavaat.
-
Sumiiffiit imigassamik sassaallerfiusartut tamarmik februaarip aallaqqaataata tungaanut nalunaaqutaq 22 matusassapput.
- 15-ileereersimaguit akiuussuserneqarsimanallu taava atuakkanik atorniartarfinnut, filmertarfinnut, imerniartarfinnut, neriniartarfinnut allanullu tamanit iserfigineqarsinnaasunut iseqqusaanngilatit. Tamanna pisiniarfinnut aamma pisortat angallassisutaanut atuutinngilaq. Isernissannut tunillatsinnikuusimanerit uppernarsarsinnaassavat.
Danmarkimit angalasut
- Januaarip ulluisa 26-at aallarnerfigalugu Kastrupimi nassatanik tunniussinermi tunillatsissimannginnermut uppernarsaateqarnissaq pisariaqarunnaarpoq. Tassa misissortissimanermut piumasaqaat atuukkunnaarpoq.
Akiuussuserneqarsimaanngitsut siusinnerusukkut pcr-imik misissortissimanerata tunillatsissimannginerat takutippagu sumulluunniit isersinnaatitaagaluarput. Kisianni naalakkersuisut nunattalu nakorsaaneqarfiat ippassaq tusagassiortunik katersortitsineranni oqaatigineqarpoq, akiuussuserneqarsimanngitsut kikkut tamarmik orniguffigisinnaasaannut soorlu atuakkanik atorniartarfinnut, biografertarfinnut, neriniartarfinnut assigisaannulluunniit februaarip aallaqqaataata tungaanut iseqqusaajunnaarput.
Kiffaanngissuseq maqaasigaa
- Ulluinnarni inuuneq atorsinnaanikuusarput, taanna maqaasisarpara, soorlu cafeersinnaanerit, meeqqallu atuakkanik atorniartarfiliarsinnaanerit, nukappiaraatiga timersoriartoq ilagalugu immaqaluunniit kammalaatikkalu cafeerujoorluni, tamakku soorunami maqaasissavakka.
Nunatsinni covid-19-imut aappassaannik akiuussuserneqarsimasut katillugit 68 procentiupput. Akiuussuserneqarsimanngitsulli sinneri akiuussusertissasut Naalakkersuisut nunattalu nakorsaaneqarfiatalu kaammattorpai.
Conny Rasmussen meqqanilu marluk akiuussusertikkusunngillat. Akiuussutissap timimut kingunerisinnaasai sukumiisumik misissorneqarnikuunngitsut taanna isumaqarpoq.
Akiuussuserneqarsimanngitsunulli immikkoortitsineq unitsinneqassasoq taassuma kissaatigigaluarpaa.
- Immikkoortitsinerit taamatut kamannartutut massakkut isigilerpakka aamma qatsullugit. Isumaqarpunga nunarput ammarneqaannassasoq, inuit taakku namminneq sianigisussat sianigiumaarput una virusitulli allatulli atulertussaagatsigu.
Tunillatsereernikut periarfissaqarput
Covid-19-imik tunillanneqareersimasut, akiuussuserneqarsimanngikkaluarunilluunniit tunillatsissimanermullu uppernarsaammik pisimagunik sumulluunniit isersinnaatitaasut, naalakkersuisut marlunngornermi tusagassiortunik katersortitsigamik erseqqissaatigaa.
