Akiuunneq imaluunniit ullorsiorneq
Ullorsiussutissaqarpugut, inuiaqatigiit Kalaallit uagut kingumut qiviarutta. Anguniakkatsinni arnat sunniuteqarluarsimasut ullumikkut malugisinnaalereerparput, Uthilie Heilmann Kalaallit Nunaanni arnat peqatigiit kattuffianni ukiorpassuarni siulittaasuusimasoq maannalu Atassut sinnerlugu inatsisartunut qineqqusartoq taama oqarpoq, taanna isumaqarpoq arnat 1948imi qinersisinnaatitaalermatali ullumikkumut killiffik ajukkunnanngitsoq ullorsiutigissallugu.
-ila tulluusimaaqaanga arnat angutillu naligiilluinnarlutik, marlunngorpat aalajangerneqartussaq, nunatsinni qulliit taakku issiavigisartagaannut naligiilluta saqqummersinnaalersimagatta, Uthillie Heilmaan oqarpoq oqarlunilu folketingemi arnat marluk ilaasortaatitavut aamma takussutissaalluartut.
Arnallumi Sisimiuni katerisimaarlutik ullorsiorput, soorlu pinnersartillutik arnaqatiminnullu nersualaarinnillutik.
Nuumili arnat atukkaminnik suli pitsanngorsaallutik akiuunniartut Katuami ullumi oqallititsissapput.
-Suli aningaasarsiat tungaatigut naligiinngilagut, arnarpassuit aamma qaffasinnerusunik atorfeqanngillat aamma arnanut persuttaasarnerit annertoorujussuarmik pineqarput,- Inge Olsvig Brandt Eqimattami 8.martsimeersoq oqallissaarutit pillugit taama oqarpoq.
Arnat ulluannut atatillugu arnanut persuttaasarnerup ajornartorsiutaanera oqariartuutigaa, tamannalu immikkut iliuuseqarfigineqartariaqarnerarlugu.
-Arnanut persuttaasarneq unitsinniarneqassappat uagut suliniartut kisitta aqqutiginata suliaq ingerlattariaqassaaq. Politikkikkut immikkut taanna sammineqartariaqarpoq nuna tamakkerlugu immikkut ittumik persuttaasarneq unitsinniarlugu iliuusissiortoqartariaqarluni (strategiplaniliortoqarluni), Inge Olsvig Brandt oqarpoq.
