Akitsuinerit borgmesterip unitsequai

Nukissiorfiit pingasunngorneq decembarip arfineq aappaat nalunaarput, Narsami Qaqortumilu innaallagissap akia januaarip aallaqqaataaniit kilowattimemut 1 koruuni 17 øremik akitsussasoq. Innallagissamik atuinermik alimasissumit atuaanermi atortorissaarutit ikkussorneqarnissaat aamma Qorlortorsuarmi erngup nukinganik innaallagissiorfiliornermi aqqiagiinngerup suliarineqarnernut aningaasartuutit qaffaanermut tunngavilersuutigineqarlutik.

Tunngavilersuutitut kingullertut taaneqartoq Simon Simonsenip akuerisinnaanngilaa.

- Aaqqiagiinnginneq suli aalajangiiffigineqanngimmat Kommune Kujallermi eqqortuusorinngilarput suliaq suli naammassinngitsoq pillugu aningaasartuutit matussuseqarniarneqarmata, Simon Simonsen oqarpoq.

Taanna isumaqarpoq inatsisit tunngavigalugit kommuuni eqqortumik naliliisoq.

- Kommuunimi inatsisileritoorput misissuitissimavarput taassumalu nalilerpaa taamaasiorsinnaanngitsut, Borgmesteri oqarpoq.

Aaqqiagiinngissuteqarnermut suliassaq maani pineqartoq sanaartortitseqatigiinnit Pihl & Sønimit Nukissiorfinnut aningaasanik piumasaqaatitalik, 2009-mili aallartittoq, maanna sivitsortumik suliarineqarpoq. Tamannalu akisuvoq.

Nukissiorfiit aalajangiusimavaat, malittarisassat naapertorlugit aningaasartuutitik matussutissaqartinniarlugit akinik qaffaaniaramik

- Aningaasartuutit suliamut tunngasut, nalunaarut naapertorlugu atuisunit tassa Qaqortormiunit Narsarmiunillu akilerneqartussaapput, Nukissiorfiit pisortaat Henrik Estrup oqarpoq.

Borgmesterilli aamma naammaginartinngilaa, kommuni ukiup tullianut missingersuusioreersoq, akit qaffannissaat nalunaarutigineqarmat.

- Aappaagumut missingersuutit naammasseqqammerpagut. Tamatuma kinguninnguaq annertuumik innaallagissap naatsorsuutigisimanngisatsinnik akitsornissaa ilimasaarutigineqarmat isumaqarput tamanna akuersaarneqarsinnaanngitsoq, Simon Simonsen oqarpoq.

Henrik Estrupillumi tamanna iluarinanngitsuusoq isumaqatigaa.

- Akigititassavut aggustimili nalunaarutigisinnaasuugutsigik, soorunami pitsaanerpaassagaluarpoq, taamaalillutik missingersuusiornermi ilanngunneqarsinnaaniassammata, aaqqissuusseriaaserli massakkutut itsillugu taamaaliorsinnaanngilagut, Henrik Estrup oqarpoq.

Tassami matumunnga atatillugu politikerit Nukissiorfiit utaqqeqqaartariaqarpaat.

- Aningaasanut inatsisissap akuersissutigineqarnissaa utaqqeqqaartariaqaratsigu. Aatsaammi akuersissutigineqareerpat missingersuusiorsinnaalissagatta, Estrup oqarpoq, erseqqissarlugulu Kujataani illoqarfiit pineqartut marluk taamaalillutik Nunatta sinnerani akinut naleqqersuunneqassasut.

- Qaqortumi Narsamilu siorna akit appaseqalutik kilowattimemut 2 koruuni 16 øreqarput. Taamaalillutik allanit akiliinerunatik allatulli akiliisalissapput. Naak Qaqortumi Narsamilu akit qaffariassagaluartut. Tamanna paasilluarsinnaavarput. Nukissiorfiit pisortaat Henrik Estrup oqarpoq.

Imeq januaarip aallaqqaataaniit Qaqortumi 3 koruuni 17 ørenik qaffariassaaq, Narsamili 77 øremik appariassalluni.

Aaqqiagiinngissutip qaqugu suliarineqarnissaa suli ullulerneqanngilaq, Henrik Estrupilli oqaatigaa, 2012-imi naammassineqassasoq.