Akisussaassuseqarneq 2013-imi pingaartinneqassaaq
Demokraatit siulittaasuat Jens B. Frederiksen ukiumi nutaami kikkut tamarmik akisussaaqataanissaannut kaammattuuteqarpoq. Imminut ilaquttanullu akisussaassuseqarneq nunallu siunissaanut akisussaassuseqarneq. Tamakku tassaapput ukiortaami oqalugiaataani pingaarnertut oqariartuutigineqartut, oqalugiaat tamakkerlugu allaaserisiap naqqani atuarsinnaavat.
Allattoq Peter Troelsen, Simon Uldum
januaarip 02-at 2013 09:23
Jens B. Frederiksenip 2012 kingumut qiviarpaa suliniutinullu angisuunut inatsisissap akuersissutigineqarnera tulluusimaarutigalugulu naammagisimaarlugu. Peqatigisaanik Siumut Aleqa Hammondilu sakkortuumik isornartorsiorpai. Frederiksen isumaqarpoq, Siumut illuatungiliuttuunermi nalaani akisussaaqataasimanngivissoq.
Jens B. Frederiksenip naalakkersuisooqatigiit maanna atuuttut Nunatta oqaluttuarisaanerani nukittunerpaajusutut unnerpai, aammalu Nunatta aningaasaqarniarneranik pitsanngoriartitsisimasutut unnerlugit. Demokraatittaaq siulittaasuata qinersinissaq qilanaarivaa, Demokraatillu inuiaqatigiit kalaallit siuttuuffiginissaannik qinersisartunit suliakkeqqinneqarnissaat neriuutigalugu.
