Akissarsiutigalugu qaqqasiortartut pingasut Canadami ajunaarsimasorineqartut
Akissarsiutigalugu qaqqasiortartut pingasut Canadami aputip sisoornerani ajunaarsimanissaat aarlerigineqarpoq.
Canadami oqartussat marlunngornermi taama paasissutissiisut, nutaarsiassaqartitsivik AP allappoq.
Angutit pingasut amerika avannarlermi qaqqat uiguleriit Rocky Mountainsip Canadamiittortaani Canadian Rockiesimi periarfeerunneqarput.
Howse Peak pingasunngormat qaqiniarsaraat, apuunnissamullu piffissaliussami apuunnatik.
Taamaammat Banff National Parkimi annaassiniartartut sumiiffik qaqqasiortartut ingerlaffigisussaasimasaat qulimiguulimmit ujaasiffigaat.
Tassani aputip sisoorsimaneranik takussutissanik, ujaqqanik nakkaasimasunik qaqqasiornermullu atortunik nassaartoqarpoq.
Banff National Parkimit taama nalunaaruteqartut, nutaarsiassaqartitsivik AFP allappoq.
Silarlunneratali aputillu sisooqqissinnaaneranik aarlerissuteqartoqarnerata annaassiniarneq uninngatippaat.
Qaqqasiortartut pingasut timersortartunut The North Facemit aningaasalersorneqartunut ilaapput.
- Maqaasineqarput, annaassiniartartullu ajornerpaamik pisimasoqarsimasoraat, AP naapertorlugu The North Face taama nalunaaruteqarpoq.
/ritzau/