Politiit nalunaarusiaat: Akissarsisoqarnerani suliassaqalaarpugut
Nuummi aqqusinerni eqqissiviilliornerit nakuusernerillu, Paamiunilu tigusarinninneq ataaseq. Tassa Kalaallit Nunaanni Politiit ulloq unnuarlu kingulleq suliassarisimasaasa ilaat. Politiit pigaartuisa pisortaat Ole Hald KNR-imut taama ilisimatitsivoq.
- Aqqusinermi ilaatigut eqqissiviilliortoqarpoq, nakuusernerillu arlallit, ingasanngitsumilli. Saqitsaallunilu oqqannerit, tassa imigassartorsimanerup malitsigisaasa ilaat, taanna oqarpoq.
Ullup unnuallu kingulliup ulapaarfiusinnaanera politiit sillimaffigisimavaat, akissarsisoqarmammi. Pisimasut assigiinngitsut kingulliit tamanna pillugu Ole Haldip sillimaffigisimavai. Aqqusinermili eqqissiviilliornerit pinartuusimanngitsut erseqqissaatigaa.
Nakuusernerit eqqartuussivitsigut suliassanngortut
Nuummi ullaaq nalunaaqutaq sisamat missaanni nakuuserniarneq kalerriutigineqarpoq.
Arnaq 19-inik ukiulik niviarsiaqqamut 15-inik ukiulimmut nakuuserniarsimasutut pasisaavoq, suliarlu eqqartuussivitsigut suliarineqartussanngortoq politiit ilisimatitsipput.
Pasisaasorli iperagaavoq, politiillu suliaq unitsikkallaraat politiit pigaartuisa pisortaat oqarpoq.
Paamiuni ujajaaneq
Paamiuni ujajaaniartoqarsimaneranik politiit ullaakkut nalunaaqutaq arfineq-marlunut qiteqquttoq kalerrinneqartut pigaartut pisortaata ilisimatitsissutigaa. Politiit suliamut tassunga atatillugu suli misissuipput, paasissutissanillu sukumiinerusunik suli saqqummiussaqarsinnaanatik politiit pigaartuisa pisortaata Ole Haldip oqaatigaa.
Taassuma vicepolitikommissæri Johan Wester innersuussutigaa, KNR-illu taanna attaveqarfiginiaraluarpaa maannamulli suli iluatsinngitsumik.
