Akissarsiassat KNR-imut ajornakusoortitsisut: Peter Olsen akuliussinnaanngilaq
- Kalaallit Nunaata Radioa inuiaqatigiinnik kiffartuussisutut (public service) pisussaaffeqarpoq nutaarsiassalerineq aqqutigalugu inuiaqatigiinnik ataqatigiissitsissalluni, politikkikkut aqutsinermik nakkutiginnittuussalluni inuiaqatigiillu naalakkersueqataanerminni sakkussaannik pilersussallugit, Tusagassiuinermi Sulisut Peqatigiiffiata (TP) siulittaasua, Oline Olsen, ammasumik allakkami allappoq.
Allakkat Ilinniartitaanermut, Kulturimut, Timersornermut Ilageeqarnermullu Naalakkersuisumut, Peter Olsenimut (IA) suliassaqarfimmut tassunga akisussaasumut allagaapput.
- Akissarsiat appasinnerat kikkut tamanut kingunerluppoq, soorlu aamma inuinnaat naalakkersueqataanerat, demokratii, taamaalilluni innarneqartoq. KNR-imi tusagassiortut piaartumik amerlineqassappata akissarsiat qaffanneqarnissaat sulissutigineqartariaqarpoq, taanna oqarpoq.
Akissarsiat appasinnerat pingaarnertut ajornartorsiutaapput, sulisut sulerulupput, tamannalu suliffimmi atugassarititaasut pitsaannginnerannik, sulisut amigarnerannik KNR-illu innuttaasunut tamat oqartussaaqataanerannullu pisussaaffimminik tunniussaqarniarneranut ajornakusoortitsilluni.
Peter Olsenip neriorsuutini eqquutsikkai
”KNR ajutooqqalluinnarpoq, pissutigalugu tusagassiortunut pilerisaarinissamut attassinissamullu akissarsiat naammanngimmata”.
KNR-ip radioaviisimik sivikilliillunilu ikilisitsinerata kingorna Suliaqaqatigiit atuagassiaat, Journalisten 2022-mi juunimi taama allappoq.
Ilinniartitaanermut, kultureqarnermut, timersornermut ilageeqarnermullu naalakkersuisup, Peter Olsenip Inuit Ataqatigiinneersup suleqatigiissitaq KNR-ip siunissaanik misissuisussaq pilersinniarlugu taamani neriorsuutigaa.
Maanna qaammatit qulingiluat qaangiupput.
Peter Olsenilli suleqatigiissitamik pilersitsinissamik neriorsuutini suli amigaatigaa.
KNR-imut pissutsit pitsanngornikuunngillat, qanittumilu allannguisariaqaqqilluni, pingaartumik kalaallinik tusagassiortunik amigaateqarneq pissutigalugu unnukkut radioaviisi immiunneqartartussanngortippaa.
Peter Olsenip allakkamut akissuteqarnermini suleqatigiissitamik, KNR-ip siunissaanik misissuisussamik pilersitsinissamik suli kissaateqarluni oqaatigaa.
- Naalakkersuisoqarfimmi sulisussaalatsineq piffissaalatsitsinerlu KNR-imut suli suleqatigiissitaliunnginninnut peqqutaanerpaapput.
Akissarsiat pissutaasut
KNR-ip pisortaata, Karl-Henrik Simonsenip kalaallinik tusagassiortunik atorfinitsitsiniarnermut akissarsiassat aamma ajornartorsiutaanerpaasorai.
- Inuit isumaqatigiissummut assingusumut allami attaveqaqatigiinnermi sulisutut atorfimmik nassaarsinnaagunik, taamatullu ukiumut 36.000 koruuninik akissarsiaqarnerusinnaagunik uagut sulisunik atorfinikkusuttunut pilerisaarinissatsinnut piffissap sivisunera tupinnanngilaq, Karl-Henrik Simonsen oqarpoq.
Taamaammat KNR-imut tunngatillugu susassaqarfimmit kultureqarnermut naalakkersuisoqarfimmit naalakkersuisumit, Peter Olsenimit politikkikkut iliuuseqartoqarnissaa Oline Olsenip piumasaraa.
- Maanna ima ilungersunartigisumik killiffeqalerpoq pissutsit politikkikkut paasineqartariaqalerlutik, 2024-milu akissarsiat pillugit isumaqatigiinniartoqarnissaata tungaanut iluarsissutaasinnaasunik nassaarniartoqartariaqalerluni.
Peter Olsenimiilli politikikkut iliuuseqartoqanngilaq.
- Kultureqarnermut naalakkersuisutut KNR-imi nutaarsiassaqartitsivimmi tusagassiortut akissarsiaannut atatillugu kiisalu Isumaqatigiinniartarfiup Tusagassiuinermilu peqatigiiffiup akornanni akissarsiat isumaqatigiinniutigineqarneranut akuliussinnaanngilanga, taanna allappoq.
Akisussaaffiik Namminersorlutik Oqartussanut inissikkaat
Karl-Henrik Simonsenip KNR-imilu sinniisup, Ane-Marie Petersenip tamarmik Namminersorlutik Oqartussat KNR-imi akissarsianut akisussaatitaappaat.
- Dansk Journalistforbundip sulinermi qanoq aningaasarsisoqartigisassanera aalajangerneq ajorpaa. Sulisitsisoq, tassa Namminersorlutik Oqartussat akissarsianik qaffaanissamut akisussaasuupput, Ane-Marie Petersen suliaqaqatigiit atuagassiaannut Jourslistenimut siorna oqarpoq.
KNR-ip naalakkersuisoq Peter Olsen akissarsianut ajornartorsiutaanerpaasunut atatillugu akuliukkusunngikkuni kalaallinik tusagassiortunik qanoq ililluni KNR-imut pissarsiniarnersoq apererusukkaluarpaa.
Peter Olsenili apersorneqarnissaminut piffissaqarani paasissutissiivoq.
