Akiliisinnaajunnaarnerup Inuili eqqorpaa
Inuilip siulersuisuini siulittaasup Josef Therkildsenip Inuilimi atuartut sulisullu assigalugit ilinniarfimmi pissutsit ilungersunartutut oqaatigai.
Inuilip ilassutissaanik sanaartortut qaammatit pingasut matuma siorna akiliisinnaajunnaarmata sanaartorneq unitsinneqarpoq.
Taannaannaanngilarli. Suliffeqarfik Inuilip ilassutissaanik sanaartortoq arlalinnik kukkussuteqarpoq, kukkussutigineqartut INIp aamma Inuplanip maanna mississorpaat.
INI a/s-imit oqaatigineqarpoq sanaartorneq aasaru aatsaat aallarteqqinneqarsinnaasoq. Sanaartornerup kinguaattoornera ilnniarfimmut annertuumik kingunerlutitsivoq. Pikkorissartitsinerit ilinniarfiup ATI-p Maniitsumit INUILImut nuunneqarnera unammisitsinerillu eqqorneqarput.
INUILIp aningaasatigut isertitsissutigisartagai tassalu pikkorissartitsinerit eqqorneqartut, Inuilip siulersuisuini siulittaasoq Josef Therkildsen oqarpoq. Inuilip ingerlanneqarnerani kaaviaartitat eqqorneqassapput tassalu pikkorissartitsinermit isertitsissutaasartut unittussaammata.
- ATI-imi ilinniartut Maniitsumiit INUILI-mut aasaq nuunneqartut pisariaqartitaat pigineqanngillat. Tassalu laboratoria sanallugu suli naammassineqanngilaq,
misissuiffissat amigaatigineqarput, atortullu Maniitsumiit nuunneqartut INUILI-mi atorneqarsinnaanngillat, Josef Therkildsen nassuiaavoq.
Sinerissami igasut nunarput tamakkerlugu iggarinneqqusaartarnerat ukiut tamaasa igasunngorniat peqatigalugit unammissutigineqartartoq ukiormanna piviusunngunngitsoorsinnaasoq, Josef Therkildsen oqarpoq.
Ilinniartitaanermut naalakkersuisoq Palle Christiansen INUILIp pissutsit akuerisinnaanagit oqarpoq, aaqqissuuteqarnissamillu utaqqisinnaannginnerarpoq.
- Ilinniartitaanermut Naalakkersuisutut oqassaanga :
Sanaartornerup unitsinneqarsimanera akuerineqarsinnaanngilluinnarmat, tassami sanaartorneqarnerata naammassineqarnissaanut piffissarititaasoq isumaqatigiissutigineqartorlu malinneqartussaammat, Ilinniartitaanermut Naalakkersuisoq Palle Christiansen oqarpoq.
- Sanaartortitsinerup piffissaq eqqorlugu naammassineqarnissaa pillugu ilinniartitaanermut naalakkersuisoqarfimmit nukingisaarutigissavarput aamma akit isumaqatigiissutigineqartut malinneqarnissaat pillugit, Palle Christiansen oqarpoq.
- Ilinniartut inissaqannginnerat pillugu aaqqiissutissanik nassaarniartoqassaaq, imaasinnaavoq Narsami ininik attartugassanik ujarlertoqartoq kisianni maannakkut tamanna qulakkerlugu oqaatigisinnanngilara.
- INUILI-p siulersuisuini siulittaasoq sapaatip akunnerata tulliani nalilersuioqatigineqassaaq, tassaangaaniillu qanoq iliuusissat suussanersut paasineqassapput, kisianni ajornartorsiutit aaqqinneqarnissaannut piaartumik iliuuseqartoqartariaqarpoq, taannami pillugu uanga utaqqisinnaanngilanga, Palle Christiansen oqarpoq.
