Akiligassaq: Ilaqutariinnut 100.000 koruunit
Akiligassap innuttaasunut tutsinneqarnissaa ilumoorsinnaanngilaq, Kommune Kujallermi borgmesteri Simon Simonsen taama isumaqarpoq.
- Kommune Kujallermi innuttaasut sinnerlugit tamanna akuerisinnaanngilara. Imaassinnaanngilaq innuttaasut pisuussutiginngisaannik sanaartortitsinermi pilersaarusiortut kukkussuteqarsimassappata, imaaliallaannaq innuttaasunut akiligassanngortinneqassasoq, Simon Simonsen oqarpoq.
Kujataani innaallagissamik atuisut ukioq nutaamiit akinik qaffaaffigineqareerput, Qorlortorsuarmi erngup nukinganik nukissiorfiup sananeqarneranut aningaasartuutit matussuserniarlugit.
Inatsisartuni ilaasortap Naaja Nathanielsenip IA-meersup taama periuseqarneq aamma ippigaa. Jens B. Frederiksenip akissummini nassuerutigaa apeqqutaasoq Nukissiorfiit maleruagassat eqqortumik eqqunngitsumilluunniit nassuiarnerai.
Nukissiorfiit isumaqatigiissitsiniarnermi Energikonsortiet I/S-imut ajorsassappata, Kommune Kujalleq piareeqqavoq eqqartuussivilersuussilluni piinngitsoortinniassallugu akiligassap atuisunut tunnissaa, taama erseqqissaavoq borgmester Simon Simonsen.
Kommune Kujalleq attaveqarnermut naalakkersuisumut Jens B. Frederiksenimut allagaqarpoq, Naaja Nathanielsenip ujartugaatut akineqarusullutik, qanoq isilluni Nukissiorfiit 300 millioner koruuninik atuisartunut akiligassiisinnaanersut.
- Piumasaqaatigivarput inatsisit suut malillugit taamatut oqariartortoqarnera ersarissaassutigineqassasoq, taamaasilluta paasisaqarluarniassagatta, borgmester Simon Simonsen oqarpoq.
Isumaqatigiissitsiniarnermi aningaasartuutit qanoq akilerneqassanersut Naaja Nathanielsen attaveqarnermut naalakkersuisumut apeqquteqarsimavoq. Akissutigineqarpoq maleruagassat aalajangersimasumik nassuiarneqarsinnaanngitsut.
