Akileraarutini allannguinissaq kinguartippat
Aningaasartalersornissaatami inissinneqarnissaa suli ungasittoq, Naalakkersuisut inatsisissatut siunnersuutissatik tusagassiortunut ullumi saqqummiukkamikkit paasinarsisippaat. Taarsiullugulu pilersaarut 2025-imik taagorneqartoq, pisortat sullissinerannik allannguissaqisoq, siulittaasup Kuupik Kleistip ilimasaarutigaa.
- Akileraartarneq Atugarissaarnerlu pillugit Isumalioqatigiititat inassuteqaataat tunngaviusumik eqqartorneqartut piviusunngortinnissaat ukiuni arlalinni ingerlasariaqartutut isikkoqarput. Qinersiviup ataasiinnaap ingerlanerani tamakkiisumik naammassineqarsinnaanerat piviusorsiunngimmat, Naalakkersuisuni suliaqarpugut takussutissiamik, takorluukkatut aamma oqaatigineqarsinnasumik, allannguiartuaarnerup qanoq ukiuni aggersuni piviusunngortikkiartuaarneqarsinnaaneranik, Kuupik Kleist oqarpoq.
Upernaaq oqaluuserineqaraluarpoq, akissarsianut akileraarutit aaqqissuuteqqinneqarnissaat pingaarnerpaasoq, sulinissaq pilerinarneruniassammat, saniatigullu atugarissaarnerulernissamut aningaasartalersuisoqarneruniassammat.
Siunertarisalli upernaakkut ataatsimiinnermi inatsisissatut siunnersuutinngortinnissat unitsiinnartariaqarnerannut, aningaasat peqqutaapput. Tassami sulinermi akissarsianik akileraarutit ilumut appartinneqassappata, aningaasanik allaniit pissarsinissaq pisariaqartoq, Kuupik Kleist oqarpoq.
Tassalu sulinikkut akissarsianit akileraarutit appartinneqassappata, aningaasat isertittakkat ikilissutissaasa taartissaannik isumaqatigiissuteqarnissaq pisariaqarpoq. Qanorlu aningaasalersueriaaseqarnissaq aaqqeqqaarlugu aatsaat, sulinermit akissarsianit akileraarutit appartinnissat Naalakkersuisut neriorsuutigerusukkaat, Kuupik Kleist oqarpoq.
Naalakkersuisulli siulittaasuata qanoq pilersaruteqarnerlutik maanna oqaatigerusunngilaa, akileraartarnerli atugarissaarnerlu pillugit isumaqalioqatigiissitat inassutaat ukiumik ataaserluinnarmik pisoqaassusillit tikkuarlugit. Tassalu sulinani isertitat, Nunarsuup sinnerani akileraarusersorneqartut Nunatsinnili maanna akileraarusersorneqanngitsut, siulliullugit isiginiassagitik, Kuupik Kleistip ilimagaa. Taava aamma Nunatta Karsiata isertittagaasa ikileriaatissaannut taartaasussanik allanik arlalinnik eqqarsaateqarlutik, naalakkersuisut siulittaasuata eqqaavaa.
Akileraarutinik appaanissami aningaasanik pisariaqartiligassanik sumit pissarsinissap suli aaqqinneqannginerata saniatigut, aamma sulisut sulisitsisullu kattuffiinik anginernik Naalakersuisut isumaqatigininninniarnissamik siunniussaqarnerat, akileraartarnermik aaqqissuuseqqinnissap kinguarneranut aamma peqqutaavoq. Amerlanerpaammi peqataanissaat Naalakkersuisut tunaartarigaat, siulittaasoq oqarpoq:
- Naalakkersuinikkut partiit akornanni, kisianni aamma suliffeqarnikkut oqartussaassuseqartut sapinngisamik annertunerpaamik isumaqatigiissuteqarnissaq siunertarivarput, Kuupik Kleist tusagassiortunik ippassaq katersortitsereerluni oqarpoq.
Akileraartarnerup aaqqisuuteqinnerani nikeriarneq siulleq, Inatsisartut upernaakkut ataatsimiinnerani pisussatut ilimasaarutaagaluartoq, ukiaru ataatsimiiinnermi pissasoq, Naalakkersuisut siulittaasuat oqarpoq.
