Akileraartarnermut maleruagaasat allanngortinnerisigut mittarfiliussasut

Nunatta avataaniit suliartortut nunaqavissuniit akileraarnikinnerunissaat, Kommunerqarfik Sermersuumit SIK-miillu isornartorsiorneqarpoq. Taamaakkaluartoq Aningaasanut Akileraartarnermullu Naalakkersuisoq akileraarnikinnerusitsinissaq avaqqunneqarsinnaanngitsoq isumaqarpoq. 

Nunaqavissut 42-44 procentinik akileraartarput, tassani kommunimut sorlermut akileraarneq apeqqutaalluni. 

AAMMA ATUARUK Inatsit tuaviortup mittarfiit aningaasalerneqarnissaat qulakkiissagaa

Maannali Naalakkersuisut Nunatta avataaniit tikisitat, mittarfiliornermi sulisussat, 35 procentinik akileraartarnissaat siunniuppaat, tassa nunatta karsianut kisimi akileraartarnissaat Naalakkersuisut siunnersuutigaat. Tamannalu paasilluarneqarlunilu isorineqarpoq. 

- Suleqatigigukkit suliagullu assigiit suliaralugit, taavali illit tiimimut aningaasarsiaqarnerullutit, taava suleqatigiinneq nuannernavianngilaq, SIK-p siulittaasua, Jess G. Berthelsen KNR-imut oqarpoq.

Tikisitat akileraarutissaat 38 procentimut inissinneqassappata, SIK-mit inooqataaffigineqarsinnaassasoq aamma oqaatigaa. 

Kommuneqarfik Sermersuup borgmesteriata assigiinngisitsiniarneq aarlerinartoqartippaa.         

- Naalakkersuisut nunatta avataaniit sulisussarsiornissaq pilerinarsarpaat, Tamanna pitsaasuunngilaq, tassami nunatsinniittut suliffissaaleqisorpassuit peqataatinneqarnissaat pingaartuusorigakku, Asii Chemnitz Narup KNR-imut oqarpioq. 

Kommune Kujalliup aamma Avannaata Kommuniani borgmesteriulersussap naalakkersuisut siunniussaat paasisinnaanerarpaat. Taakku kommuniminni mittarfeqalernissaat pingaarnertut isigaat. Tassami mittarfiliortoqarnissaa sivisuumik utaqqisimavaat, mittarfiillu kommunit aningaasaqarnerinut iluaqutaanissaat qularinngilaat. 

Mittarfiliornissanut pilersaarutit piviusunngornissaat qulakkeerniarlugu tikisitat akileraarnikinnerunissaat avaqqunneqarsinnaanngitsoq, Akileraartarnermut Naalakkersuisoq, Aqqaluaq B. Egede isumaqarpoq. 

- Akileraarut qaffakkiartortillugu pilersaarutit piviusunngortitsisinnaaneq killinikkiartussaaq, Aqqaluaq B. Egede oqarpoq. 

Akileraartarnermi malittarisassat allanngortinnerisigut tikisitat akileraarutaat nunatta karsianut tuttussanngortinneqarnerisigut mittarfiliornissamut aningaasat taarsigassarsiat akilersorneqarsinnaasut naalakkersuisoq isumaqarpoq.

AAMMA ATUARUK Danske Bank mittarfiliornissamut aningaasaliisussarsioqataassaaq