Akiitsut siunnersuinikkut 11 milliuunit koruuninik ikilisinneqartut
INI A/S-ip akiitsut 11 milliuunit koruuninik siorna ikilisippai.
Aningaasaqarnikkut ingerlatsineq pillugu 2019-imi nalunaarusiaq naapertorlugu ineqarnermut akiitsut 2018-imi 67 milliuunit koruunioriarlutit siorna 56 milliuunit koruuninut ikilisimapput.
INI-p ilaqutariinnut ajornartorsiuteqartunut akiitsuminnik akiliisarnissamut siunnersuisarnissamik suliniutini annertusarmagu taamaattoqarpoq.
Suliniutimiillu iluaqutit malunnartut inissiaatileqatigiiffimmit oqarput.
- Ineqarnermut akiitsut ikilisinnissaannut iluaqutaallunilu, aningaasaqarnermik misissuinissamut ikiortinnissap attartortunut iluaqutissartai ataatsimut isigalugu ukkatarineqalerput, INI-p siulersuisuisa siulittaasuat, Mads Barlach Christensen, inissiaatileqatigiiffiup nalinginnaasumik maajip ulluisa arfineq-aappaanni ataatsimeersuarnerani oqarpoq.
AAMMA ATUARUK Siunnersortit inimut akiliinissamut ikiorsiissasut
Ilaqutariit ilungersortut aningaasaqarnerminnik misissuinissamut akiitsuminnillu akilersuinissamut pilersaarusiornissamut siunnersortinit ikiorneqartarput. INI naapertorlugu akiligassat akilerneqartarpata tamanna INI-muinnaq iluaqutaanani aamma attartortunut iluaqutaassaaq.
AAMMA ATUARUK Ineqarnermut akiliutinik akilinngitsuukkat ikilisinneqartut
Angerlarsimaffimminninngaanniit anisinneqartut ikilissapput, attartortullu inuuniarnikkut aamma ajornartorsiuteqartut kommuninik Namminersorlutik Oqartussanillu suleqateqarnikkut siusinnerusukkut iliuuseqarfigineqalersinnaassapput.
- Kommuninik, politiinik Allorfimmillu suleqateqarluni suliaqarfiit akimorlugit ukkataqarnerup attartortunut pisortanullu iluaqutaasussanik silatusaartumik aaqqiisoqarsinnaasoq takutippaa, INI-p ukiumoortumik nalunaarusiaani allaqqavoq.
4 millionit koruunit siunnersorteqarnermik aaqqissuussap ingerlanneqarnissaanut siorna atorneqarput.
INI A/S akileraannginnermi 1,9 milliuunit koruuninik sinneqartooruteqarami naatsorsuutigineqartumit milliuunip affaannik sinneqartooruteqarnerusoq, ukiumoortumik nalunaarusiami allaqqavoq.