Aki-Matilda Høegh-Dam Danmarkip qimaasunik tigusinissatsinnut kimigiiserfigissanngilaatigut
Danmarkimut qimaasut nunamullu isernissamik qinnuteqartut itigartitaasut Kangilinnguani sakkutooqarfiusimasutut ilisimaneqartumi inissiigallartarfimmut inissinneqarsinnaassapput.
Tamanna Dansk Folkepartiip siunnersuutiginikuuaa.
Suliaq taanna Folketingip ataatsimiittarfiani ippassaq oqallisigineqarpoq, tamanna Siumumit Aki-Matilda Høegh-Damip oqaaseqarfigaa.
- Danmarkip Kalaallit Nunaat nunanit allanit qimarngusut imaluunniit Danmarkimi nunaserusullutik qinnuteqartut nunaqartinnissaannik pinngitsaalissanngilaa, ingammik Kalaallit Nunaat akisussaaffik tamannarpiaq tigumminngippagu, Aki-Matilda Høegh-Dam oqarpoq.
Nunami allamiut pillugu oqartussaaffik Danmarkip akisussaaffigaa, taamaammallu Inatsisartunit suliarineqartarani.
Ajortuliornissaq periarfissaanngitsoq
Dansk Folkepartiip nunanut allanut tunngasunut oqaaseqartartuata, Pia Kjærsgaardip Kangilinnguani inissiigallartarfimmik novembarimi siunnersuuteqannginnerani partii nunatsinniittunik attaveqarniaqqaarsimannginnera Aki-Matilda Høegh-Damip aamma pingaartuutippaa.
- Kalaallit Nunaat nunarujussuuvoq, taamaammat ingerlaarlulutik ajortuliornissaat toqqissisimanngisitsinissaallu periarfissaanavianngilaq. Tamanna ilaasa angerlarusulerneranik kajumissaataasinnaavoq, nunanut allanut tunngasunut oqaaseqartartoq, Pia Kjærsgaard BT-mut taamani oqarpoq.
AAMMA ATUARUK Dansk Folkeparti: Nunamut qimaasutut iserniartut itigartinneqartut Kangilinnguanut nassiunneqarlik
Aamma inunnut maani tikilluaqqusaanngitsunut nunaannarmi Brødstrupimi aallartitsisarfimmik pilersitsinissaq Kalaallit Nunaannit isumaliutigineqanngitsoq, Aki-Mathilda Høegh-Dam oqarpoq. Aamma Kalaallit Nunaannit piffimmi tassani pissutsit pillugit ilisimasaqartoqanngikkaluartoq imaluunniit piffimmi inuiaqatigiit Folketingiluunniit ilanngutitinnagit.
- Maanna nunatsinni avissaartuunneqarpoq, tamannalu ilaatigut pissuteqarpoq nunasiniartut soorlu Danmarkimiit suliartorniartut pillugit inatsiseqanngimmat, Aki- Matilda Høegh-Dam erseqqissaavoq.
Ministeri itigartitsisoq
Dansk Folkepartiip Danmarkimi qimaasuujumasunut, itigartitaasimasunut pinerluuteqarsimasunullu, angerlartitaasussanut Kangilinnguani sakkutooqarfikumi inissiigallartarfiliortoqarsinnaanersoq, danskit naalakkersuisuisa nunatsinni naalakkersuisunut apeqquteqarnissaannik siunnersuuteqarnera suliami pineqarpoq.
Tamanna nunat allamiunut akuulersitsiniartarnermullu ministerip Mattias Tesfaeyip itigartitsissutigaa.
- Qimaasuujumasut itigartitaasut najugaqarfigigallagassaannik Kalaallit Nunaanni pilersitsinissaq aaqqiissuutissaanngitsoq isumaqarpunga. Aamma taamaaliornissaq qimaasujumagaluartut amerlanerusut angerlakaatinnissaannik naalakkersuisut pilersaarutaanni ilaanngilaq.
AAMMA ATUARUK Qallunaat naalakkersuisui Qimaasuujumasunut itigartitaasunut Kangilinnguani inissiigallartarfiliussaanngitsut
- Qimaasuujumagaluartut itigartitaasunut Kalaallit Nunaanni inissiigallartarfiliornissaq isumatusaarnerusutut isiginngilarput. Paasisakkalu malillugit Namminersorlutik Oqartussat aamma taama isumaqarput. Taamaammat Kalaallit Nunaata naalakkersuisuinut nutaanut saaffiginninnissamut pissutissaqanngilaq, Mattias Tesfaye Folketingimi oqaaseqartarfimmit ippassaq oqarpoq.
Kangilinnguit nunatta kujataani Arsuup eqqaaniippoq. Kangilinnguit USA-mit Sorsunnersuup Aappaani 1941-mi pilersinneqarpoq, tamannalu illersornissamut isumaqatigiissummut, amerikamiut danskit diplomatiannut, Henrik Kaufmannimut isumaqatigiissutaannut ilaalluni.
Sakkutooqarfiusimasoq piffissami nutaanerusumi Issittumi Sakkutooqarfiup sumiiffigigaluarpaa, Issittumi Sakkutooqarfilli Nuummut nuummat 2012-mi matuvoq.
Sakkutooqarfiulli ammaqqinneqarnissaa kinamiut suliffeqarfiata, General Nice Groupip sumiiffimmik tigusinissamut soqutiginninnermik oqarfiartuuteqarnerata kingorna 2016-imi aalajangerneqarpoq.
