Akerliusoqaraluartoq tikaagulliusaarniarnissaq Islandimit akuerineqaqqippoq

Tikaagulliusaanik piniartoqaqqissinnaalernissaa Islandimi naalakkersuisut aalajangerpaat. Nutaarsiassaqartitsivik Reuters DR aallaavigalugu taama allaaserisaqarpoq.

Tikaagulliusaat naalinneqareernermi kingorna akunnerpaalunni suli uumasinnaanerat nalunaarusiami tikkuarneqareersorlu tikaagulliusaanik Islandimi ukioq manna juunimi piniartoqaqqusaajunnaarallartoqarpoq.

Uumasunut atugassarititat pillugit inatsit unioqqutillugu piniartoqartarnerarlugu tikaagulliusaanik piniartoqaqqusaajunnaarallartoqarpoq.

Arfernik piniariaatsit pitsaanerulersinneqarsinnaanerat periarfissaasoq suleqatigiissitap oqaatigimmagu Islandimi naalakkersuisut tikaagulliusaanik piniartoqaqqissinnaalernissaa nalunaarutigaat.

- Piniariaatsit pillugit malittarisassat sukannernerulissapput, piniarnermilu atortut pillugit malittarisassat aamma sukannernerulissallutik. Arfannniarneq aamma nakkutigineqarnerulissaaq, Islandip aalisarnermut piniarnermullu ministereqarfia taama nalunaaruteqarpoq. Nutaarsiassaqartitsivik Reuters taama allappoq.

Arferit sannaat pillugu aamma pikkorissartoqartalissaaq, arferit naalliutsinneqartannginnissaat aamma siunertaalluni.