Ajunaarnersuaqalerneranik kalerrisaarut siggaraangat tamanit tusaaneqarsinnaasanngitsoq - Borgmesteri nipangersimaannartoq
Ajunaarnersuaqalerneranik kalerrisaarut siggaraangat tamanit tusaaneqarsinnaasanngilaq.
Tamannalu naammaginanngitsoq, Kommuneqarfik Sermersuup borgmesterip siullertut tullersortaa aamma Sanarfinermut Avatangiisinullu Ataatsimiititami ilaasortaq Justus Hansen (D) erseqqissaavoq.
- Ajunaarnersuaqalerneranik sumiiffiit ilaanni suli kalerrisaarusiisoqarnikuunngitsoq soorunami arajutsisimanngilara, ikkunneqareersulli nipikippallaarput. Tamannalu ilissi (tassa KNR, aaqq.)) aamma arajutsisimanagu oqaluttuaraarsi, aatsaalli oqaluttuarereerassiuk aatsaat qanoq iliuuseqarfiginiarneqalertoq ersarippoq, taanna KNR-imut oqarpoq.
Tamanit tusaaneqarsinnaanissaatut naatsorsuussaanngitsoq
Ajunaarnersuaqalerneranik kalerrisaarutit siggaraluarpata tamanit tusaaneqarsinnaasanngitsut, sapaatit akunnerata siuliani oqaluttuaraarput.
Tamanna nassuiaatissaqaluartoq, Kommuneqarfik Sermersuup upalungaarsimanermut pisortaa Jes Damgaard oqarpoq:
- Qatserisartunik aggersaasoqarsinnaaniassammat qangali kalerrisaarusiissoqarnikuuvoq. Taava politiit aamma Innuttaasunut taassuminnga kalerrisaarisinnaapput. Kisianni inuiaqatigiinnut tamanut atugassiatut naatsorsuussaanngikkaluarput, taanna oqarpoq.
Illoqarfiit alliartornerat ajunaarnersuaqalerneranik kalerrisaarutit siggaraangata tamnit tusaaneqarsinnaasannginnerannut peqqutaaqataasoq, politikommissæri aamma Kalaallit Nunaanni Politiivini pigaartut aqutsisuat Brian Thomsen oqarpoq.
Taamaammat tamanna ingammik kommunini annerni ajornartorsiutaavoq.
Borgmesteri nipangersimaannartoq
Ajunaarnersuaqalerneranik kalerrisaarutit qanoq nipitutigisumik nipikitsigisumilluunniit siggartassanersut napparutaallu qanoq amerlatigissanersut kommunit akisussaafigisaat, Kalaallit Nunaanni Politiit ilisimatitsipput.
Tusagassiutinit tamanna aatsaat oqaluttuarineqareermat aatsaat qanoq iliuuseqarfiginialerissi naammaginarsorivisiuk?
- Soorunami naammaginarsorinngilarput. Upalungaarsimasulli ingerlatsivimmeersullu tamanna pillugu oqaloqatigeereersimassangatillu qanoq iliuuseqalersaalereersimassangatippakka. Kalerrisaarutilli sanarfinermut ataatsimiititami tulliani ataatsimiinissatsinni oqaluuserisassatsinnut ilanngunneqarsimanngitsut takuara, Justus Hansen oqarpoq.
Taamaammat kalerrisaarutit amerlineqarnissaat Kommuneqarfik Sermersuup Sanarfinermut Avatangiisinullu Ataatsimiititaanut siunnersuutigissallugu neriorsuivoq.
Kommuneqarfik Sermersuup borgmesteria, Avaaraq S. Olsen (IA), ajunaarnersuaqalerneranik kalerrisaarutit siggaraangata tamanit tusaaneqarsinnaasannginnerisa sooq suli iliuuseqarfigisimannginneraat apeqqutiginiarlugu oqaloqatiginiarsimagaluarparput.
Taanna tamatumunnga tunngasumik oqaaseqarumanngilaq, upalungaarsimasunulli immikkoortumik pilersaarusiaq qaammatialuit qaangiuppata tamanut saqqummiunneqassasoq ilisimatitsissutigaa. Tamanna politikkikkut isummerfigineqassangatikkitsik, Kommuneqarfik Sermersooq ilisimatitsivoq.
Paasissutissiilertoqartalerli
Danmarkimi ajunaarnersuaqalerneranik kalerrisaarutit ajunnginnersut ukiut tamaasa misilittarneqartarput. Maajimilu misilittarneqarmata sms-kkut kalerrisaareriaasertaaq aamma misilittarneqarpoq.
Tassa Danmarkimi inuit ajunaarnersuaqalerneranik siggartaatitiguinnaanngitsoq oqartussanilli aamma sms-erfigineqarlutik kalerrisaarneqarput.
Tamanna nunatsinni misilittarneqarpat pitsaassasoq, Justus Hansen isumaqarpoq:
- Nunatsinni ullutsinni taamaaliortoqarsinnaasariaqaraluarpoq. Inuttaasut toqqissisimanissaat aamma eqqarsaatigalugu. Ajunaarnersuaqalerneranik kalerrisaarut siggaraangat soorunami isumakulunnartarpoq. Innuttaasunut sapinngisaq tamakkerlugu paasissutissiilertoqartaleqqunaqaaq, sms-erlunilu taamaaliortoqarsinnaakutsoorpoq, taanna oqarpoq.
Taamaammat ajunaarnersuaqalerneranik Kommuneqarfik Sermersoormiut sms-erfigalugit kalerrisaarneqartalissasut, Justus Hansenip aamma siunnersuutiginiarpaa.
