Ajoraluartumik qinersisinnaanngilatit
Inaluk Møller Lund Nuummeersoq oqartussaaqataanini atorniarlugu qinersiartorami paasitinneqarpoq nammineq inuttut normuni allap atorlugu qinersisoqarsimasoq. Tamat oqartussaaqataaffigisaanni taamatut pisoqarsinnaanera soorunami akissutissarsiuminaappoq. Nunatsinnili qinersinermi taamatut peqquserluttoqarsinnaanera ajorluinnarpoq.
-Atera krydsilerneqareersimavoq. Assut uuminarpoq. Kiisami qinersisussanngorama, aammalu qilanaarlunga utaqqereerlugu, qinersereersimaninnik paasitinneqarpunga. Kisianni tassa qanoq iliuuseqarfigineqarsinnaanngilaq, peqquserluttuliornerusinnaavormi, aamma ajuusaarlutik utoqqatserfigigaannga, aamma kissaatigigukku maalaaruteqartarfimmut maalaaruteqarsinnaaninnik paasitinneqarpunga, Inaluk Møller Lund Nuummeersoq oqarpoq.
Nuummi qinersinermik aqutsisoq Karno Lynge aamma qungujussaqarpallaanngilaq, taamatulli pisoqarsinnaaera nassuerutigaa. Taamatut pisoqannginnissaa qulakkeerusukkaanni taava qinerseriaaseq allanngortinneqartariaqarpoq. Aamma Inatsisartut ataatsimiilerpata pingaartillugu eqqartorneqartariaqarpoq.
-Suliaq misissorparput, qanorpiarlu pisoqarsimanera paasissallugu ajornakusoortupilussuuvoq. Pineqartoq qinersisimanersoq imaluunniit aqqit allattorsimaffianni kukkunikkut krydsiliisoqarsimanersoq qularnaatsumik paasisinnaasimanngilarput. Ajoraluartumilli arlaatigut kukkusoqarsimavoq, tamannalu ajuusaarnarpoq, Karno Lynge oqarpoq.
