VIDEO Air Greenlandip ukunani sulisut soraarsinniarpai
Air Greenlandip kujataani kiffartuussinissamik isumaqatigiissutimik annaasaqarnerata malitsigisaanik sumi soraarsitsisussaanerluni maanna nalunaarutigaa.
Narsarsuarmi sulisut qulit, Qaqortumi arfinillit, Narsami pingasut Nanortalimmilu marluk soraarsinneqassapput. Nuummilu kujataanut toqqaannartumik sullissisut arfineq pingasut soraarsinneqassasut, Air Greenlandip sulisoqarnermi immikkoortortami pisortaata, Mads B. Christensenip KNR-imut oqaatigaa.
Qaqortumi mittarfiliornissaq pissutigalugu Narsarsuup mittarfiata siunissaa nalornissutigineqareerpoq, soraarsitsinissallu toqqissisimannginnerulersitsisut, Narsarsuarmi nunaqarfiup siulersuisuisa siulittaasuat, Mouritz Karlsen, oqarpoq.
- Maani ingerlatitsiniartuulluni aamma innuttaasuulluni inooqataarujoorneq toqqissisimananngilaq. Pissutsit ersarissumik nassuiaassutigineqartariaqarput, Mouritz Karlsen, KNR-imut oqarpoq.
Kiffartuussinissamik isumaqatigiissuteqartoq, Disko Line, Qaqortumi atorfeqartussanik allagarsiussaqarnikkut inuttassarsiuivoq. Ingerlatseqatigiiffik ilaasartaatiminnut umiartortussanik pingaartumik Qaqortumi najugalinnik ujartuivoq.
Sulisut qassit ingerlatseqatigiiffimmi pisariaqartinneqarnersut, pisortaata Frederik Sandgreenip suli ilisimanngilaa, umiartortulli saniatigut Disko Line Qaqortumi allattoqarfimmi sulisussanik aamma pisariaqartitsisoq pisortap oqaatigaa.
Illoqarfinni assigiinngitsunik qassit soraarsinneqassanersut nunap assingani takukkit.
