Air Greenland: Danmarkimiit nunatsinnukartut toqqini unnuinnginniassammata angalanissaat kinguartinneqarput

- Ulapputeqaagut.

Air Greenlandip tusagassiisartua Inga Dora G. Markussen KNR-imut taama oqarpoq.

Ulluni tulliuttuni Nuummukartussaagaluit Maniitsuliartussaagaluillu taavalu Danmarkimiit nunatsinnukartussat angalanissaat kinguartinneqarput. Københavnimiit Kangerlussualiartussat 219-it angalanissaat kinguartinneqartut, Sermitsiaq.AG allappoq. Taakku Nuummut Maniitsumullu ingerlaqqittussaapput. 

Tamatumunnga peqqutaasut marluupput: Siullermik illoqarfinni taakkunani ippassaq sisamanngornermi ullumilu tallimanngornermi anorlerpallaarnera peqqutaalluni timmisartut taakkunaniit tinginiapiloorlutillu taakkununnga minniapiloortarput. 

Aappaassaanik Kangerlussuarmiit ingerlaqqinneq ajulertorpassuaqarpoq. Taakku massakkorpiaq unnuiffissaqartinneqanngillat. 

Kangerlussuarmiit ullaaq ingerlariaqqinneq ajulertut 332-upput. Taamaammat Danmarkimiit Kangerlussualiartussat 219-it angalanissaat Air Greenlandimit kinguartinneqarput. 

Ilaasussat Kangerlussuarmi toqqini unnuinnginniassammata timmisartuussinissaraluatik taamaatikkitik, Inga Dora G. Markussen oqarpoq.

- Kangerlussuarmiit ingerlaqqinneq ajulertut amerlinissaat ingalanniarlugu taamaaliorpugut. Taakkumi unnuiffissaqartinneqanngillat. 

Ajornartorsiutaaqisoq timersortarfillu

Kangerlussuarmiit ingerlariaqqinneq ajulertorpassuaqarmat unnuiffissaqartinneqannginnerat ajornartorsiortitseqisoq, taanna oqarpoq. Unnuisarfinni akunnittarfinnilu inissat tamarmik inniminnerneqareerput, barakkinilu tassa ingerlariaqqinneq ajulertut unnuiffigikkajuttagaanni aamma inissaqarani. Taamaammat ingerlariaqqinneq ajulertut ilaat timersortarfimmi unnuiffissarsineqarput.

AAMMA ATUARUK Nuummut Maniitsumullu timmisartuussinissaraluit anorersuarnera peqqutaalluni taamaatittut kinguartittullu

Taakku qasserpiaanersut, Inga Dora G. Markussenip ilisimanngilaa. 

- Ingerlariaqqinneq ajulertut Mittarfeqarfiit suleqatigalugit qipissarsillugillu unnuiffissarsivagut. Massakkorpiarli ulapaarfiuvoq, unnuiffissallu tamavimmik ulikkaaqqammata taamaaliortariaqarsimavugut, Inga Dora G. Markussen oqarpoq.

Qatsoriartussasoq - pujussangatinneqarlunili

Nuummi ullumi tallimanngornerup ingerlanerani qatsoriartussasoq, DMI-p Nuummi silasiorfiani silasiortoq Marielle Fournier oqarpoq.

Nuup mittarfiani ullaaq nalunaaqutaq arfernup missaani anorersuartut sakkortutigisumik anoraasuartarpoq. 

- Ullup qeqqata kingornaniit unnuup tungaanut atuuttumik qatsoriartussaaq. Anorlingaatsiarporli, silasiortoq oqarpoq. 

Ullunilu tulliuttuni silaqqinnavianngitsoq ilimasaarutigineqarmat ulluni taakkunani timmisartuussisoqarsinnaassasoq ilimananngivippoq.

- Ulluni tulliuttuni silarluinnarnissaa ilimasaarutigineqarmat Kangerlussuarmiit ingerlariaqqinneq ajulertunik timmisartuussisoqarallarnavianngilaq. Pujornissaa ersernerlunnissaalu ilimasaarutigineqarpoq. Tassa Nuummi, Ilulissani, Sisimiuni, Narsarsuarmi Kulusummilu taamaassangatinneqarpoq. Taamaammat ulapputeqaagut, Inga Dora G. Markussen oqarpoq.

AAMMA ATUARUK Kangerlussuarmi ulappunnersuaq: Uuttuut 1-miit 10-miippat uagut 9-miippugut

Nuummut Maniitsumulluunniit ingerlaqqittussat 219-it ilaat Danmarkimiit aatsaat ulluni tulliuttuni Kangerlussualiassasut nalunaarfigineqarput. Taakku nammineq unnuiffissarsiortariaqassasut ilisimatinneqareerput.

Taakku nassatanik tunniussiartunnginnerani ilisimatinneqartut, Inga Dora G. Markussen oqarpoq.

Air Greenland massakkut pisumut assingusumik qaammatip siuliani tassa juulip qiteqqunneranin nalaataqarpoq.  Ilaasummi 1000-t missaat sineriammi sumiiffinnit assigiinngitsunit taamani pujoqattaarluni qulisimaqattaarmat aamma ingerlariaqqinneq ajulerput.

Taamaammat Air Greenlandip taamanikkut ilaasut ingerlariaqqinneq ajulertut ikiliartorniassammata billetseerniarunnaarallarpoq.  

Juulilli 18-ianni billetseerniaqqilerpoq.