Air Greenland Naalakkersuisumit naammaginartinneqanngilaq
Qulimiguulinnik timmisartuussinissat taamaatinneqarnerannut pissutaasut paasiniarlugit Air Greenlandip pisortaanut Naalakkersuisoq attaveqarniarpoq.
Timmisartuussinissat taamaatinneqarnerinut Upernaviup nunarfiini qulingiluaasuni innuttaasunut kipiluttunarpoq.
- Kipiluttunarpoq taama avinngarusimatigisumiilluni qulimiguulimmik tikinneqarneq ajorluni, nunaqqatitta ilaata nissuni napikuuvaa illoqarfimmilu napparsimavimmi misissorneqarluni suliarineqartariaqarpoq, Thimothæus Petersen Kullorsuarmi nunaqarfinni aqutsisuni siulittaasoq taama oqarpoq.
Qulimiguullit aallarsinnaannginnerannut pissutaasut tassaapput teknikkikkut ajoquteqarnerit aamma silap ajornera.
Taakkuali kisimik pissutaanngillat. Nunaqarfinnut angallassissutituaasoq sulianut allanut ujaasinernullu attartorneqarsimasoq.
Angalaniartullu pinerit tamaasa utaqqisariaqarput.
Allanimmi angallatissaqanngillat.
- Allanik periarfissaqanngilluinnarpoq helikopteri taanna kisimi angallatigineqarsinnaavoq isumalluutituaallunilu, tarnip pissussaanik ilisimasalik Vilhelm Berthelsen Norgemi najugaqartoq Kullorsuarmit ullut qulingiluanngulersut matuma siornatigut aallartussaagaluartoq taama oqarpoq.
Taamaattumik attaveqarnermut Naalakkersuisup Martha Lund Olsenip timmisartuutileqatigiiffik Air Greenland taanna Namminersorlutik Oqartussanik Upernaviup eqqaani kiffartuussinissamik isumaqatigiissuteqarfigineqartoq attaviginiarpaa, paasiniarlugu sooq qulimiguulinnik angallassinerit taama sivitsortigisumik kinguaattooqqanersut.
- Paasiniarparput sooq qulimiguulik angalaneq ajornersoq aamma paasiniarparput sooq helikopteri allanut atorneqartussanngorlugu attartoqartarsimanersoq aamma qulimiguulinnut ilaasussaat sooq tunulliunneqarsimanersut Air Greenlandip pisortaanut paasiniarparput.
Attaveqarnermut Naalakkersuisoq Martha Lund Olsen taama oqarpoq.
Timmisartuutileqatigiiffik Air Greenland apersorneqarnissaminik kissaateqarsimanngilaq, taamaallaalli allappoq silap ajornera unammillernartuusimasoq periarfissalli tamaasa atorlugit angalaniarlutik eqqorneqartut kiffartuunniarneqartut.
