Timmisartoq pisoqalilersoq Norsaq aappaagu atorunnaassaaq.Assi: Air Greenland

Air Greenland millionerpassuarnik akilimmik nutaamik timmisartusisoq

Air Greenlandip timmisartorsua Norsaq 1998-imeersoq maanna nutaamik taarsertussanngorpoq.

Air Greenlandip franskit timmisartuliortartuanut isumaqatigiissummik atsioqatigiinneratigut imarpik qulaallugu timmisartuussisartussamik nutaamik pisaartussanngorpoq.

Timmisartoq nutaaq Airbus A330-800neo Norsamut taarsiunneqassaaq.

Air Greenlandimi pisortaaneq, Jacob Nitter Sørensen tusagassiortunut katersortitsinermini taama oqarpoq.

- Maanna piffissaalluarnerani timmisartumik nutaamik pisivugut, timmisartorsuarmi Norsaq pisoqaavoq taarsertariaqarlunilu. Norsaq 2022-imi imminut akilereersimassaaq taamaammat 2021-imi nutaamik taarsernissaa maanna piffissaalluarpoq, Jakob Nitter Sørensen oqarpoq.

Aatasaat taama aningaasaliitigaaq

Air Greenlandip timmisartussaa nutaaq Airbus A330-800neo
  • 305-inik issimasoqarsinnaasoq.
  • 8,150 nm-mik isorartunerusumik timmisinnaasoq (nautical miles) - 15.000 kilometeri.
  • Norsamut sanilliullugu ilaasumut ataatsimut CO2-mik aniatitsinnginnerusoq.
  • Ikummatissamik 14 %-imik atuinikinnerusoq aamma CO2-mik aniatitsinikinnerusoq.

Tusarfik: Air Greenland.

Air Greenland aatsaat taama annertutigisumik aningaasaliivoq.

Timmisartoq nutaaq 1,7 milliadit koruuninik naleqarpoq. Air Greenlandilli akia tamakkiisumik akilersinnaanngilaa, millionilinnut kisitsisinik pingasunik aallarniutilinnut isumaqatigiissuteqarpoq.

Air Greenlandip timmisartumut nutaamut pisinissaminut saniatigut oorinik attartussaaq. Timmisartuutileqatigiiffik naapertorlugu Air Greenlandip 15-30 procentii nammineq akilissavai, aningaasallu sinneri attartorniarneqassallutik.

- Timmisartoq aningaasaliisarnitut allatut aningaasalersorneqassaaq. Tassa imaappoq: Aningaasartuutissat ilaat nammineq matussusissavagut, sinnerilu attartussallugit, allatigullu aningaasaliissutissanik periarfissaqarpoq, soorlu aningaaserivitsigut, attartuiffitsigut, aningaasaliisinnaasullu allat, Jacob Nitter Sørensen oqarpoq.

Nunarsuarmi timmisartuutileqatigiiffiit akornanni pingasuinnaat timmisartumik taamaattumik pinikuupput, Air Greenlandilu tassa taakkununnga ilaalluni. Air Greenlandillu oqarnera naapertorlugu timmisartorsuassap akianik tamanna ilaatigut appartitseqataasimalluni

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat