Air Greenland aatsaat taama ilaasoqartigalunilu angusaqarfiulluartigisoq
Suliffeqarfissuaq Air Greenland, Hotel Arcticimik Nunattalu Angalatitsivianik piginnittuusoq, ukioq kingulleq siuariarfiungaatsiarpoq.
Suliffeqarfissuup ukiumoortumik naatsorsuutit saqqummiunneqannginnerini tusagassiorfinnut nalunaarutaani tamanna atuarneqarsinnaavoq.
Aningaasat kaaviiaartinneqartut siorna katillugit 1,37 milliardit koruuniusut 70 millionit koruunit missaannik amerleriaateqarfiupput.
Tamatumunnga peqatigitillugu angusat 2017-imi 44,9 millionit koruuniusut siorna 52,1 millionit koruuninut amerleriaateqarput. Ukiumoortumillu angusat 2015-imiilli aatsaat taama pitsaatigipput.
Taamani angusat 60 millionit koruuniupput.
Attartortitsinerit ilimagisamit iluanaaruteqarfiunerusut
Pingaartumik timmisartortitseqatigiiffiup attartortitsisarnera angusanut ilaqutaalluarsimasoq, suliffeqarfissuup siulersuisuini siulittaasoq Kjeld Zacho Jørgensen taama oqarpoq.
- 2018-imi Air Greenland 80,8 millioninik angusarissaarpoq, tassani angallavinni attartortitsisarnernilu niuerfitsinni naatsorsuutigisamit annertunerusumik suliaqarsimalluta. 2018-imi timmisartunut ilaasut 431.000-iupput, aatsaat taama amerlatigalutik, tusagassiorfinnut nalunaarummi taama oqarpoq.
AAMMA ATUARUK Air Greenland lejer ekstra fly for at løse trafikkaos
Siuariartorneq ilaasullu aatsaat taama amerlatiginerat ukioq manna attanneqarsinnaasut naatsorsuutigalugu, nalunaarummi aamma oqaatigaa.
Air Greenland angallavinni angallassineri siorna 4 procentinik aamma siuariarfiupput, siuariaatigineqartullu annerpaartaat Kangerlussuup Københavnillu akornanni timmisartuussinermeersuupput.
Islandimulli timmisartuussinerit aamma amerleriaateqartinnissaat iluatsinneqartoq aamma oqaatigineqarpoq.
- 2017-imi Islandimut timmisartuussinigut annertusivagut, tamatumalu kingunerisaanik 2018-imi Kalaallit Nunaata Islandillu akornanni ilaasut 29 procentinik amerlanerusut timmisartuunneqarput. Tamanna Islandimi niuerfiup 12 procentinik appariarneranut, taamaalillunilu Air Greenlandimi niuerfimmi pissarsiassat amerleriarnerinut naleqqiullugu isigineqassaaq. Pingaartumik aasaanerani Ilulissat, Kangerlussuup aamma Reykjavikip akornanni angallavimmi ilaasut sisamariaatingajammik amerlinerisigut Air Greenlandip pissarsiai amerlanerulerput, Kjeld Zacho Jørgensen taama oqarpoq.
Mittarfiliornissamik pilersaarutit nutaanik isumaliutigisassaqalersitsisut
2019-mi aamma Nuummi, Ilulissani Qaqortumilu mittarfinnik nutaanik pingasunik sanaartortoqarnissaanut atatillugu pilersaarusiornikkut pingaarutilinnik arlalinnik aalajangiisoqartussaassaaq.
Suliffeqarfissuarmi pisortaaneq, Jacob Nitter Sørensen, taama erseqqissaavoq.
AAMMA ATUARUK Silaannakkut angallassineq silap ajorneranit eqqorneqarpoq
- Ukiut pissanganartut ornitavut qilanaaraagut. Aappaatigut manna attaveqaatini atorneqartuni sullitanik kiffartuussinerput angallavinnullu pilersaarutivut pitsanngorsartussaavagut, illuatungaatigullu attaveqaatit nutaat misissortussaavagut, Air Greenlandilu 2023-mi qanoq isikkoqassanersoq naliliiffigisussaallugu, pisortaaneq oqarpoq nangillunilu:
- Taamaattumik Air Greenlandip unammillersinnaassusia, sullitanik kiffartuussinera, piujuartitsiniarluni suliniutai aammalu aaqqissuussaanera suliffissuartullu ineriartornera pillugit suliniuteqarnissamut pingaarutilinnik aalajangiisoqartussaavoq.
Hotel Arctic apparsaataasoq
Suliffeqarfissuaq ataatsimut isigalugu 2018-imi siuariarfiugaluartoq, Hotel Arcticimi ukiumoortumik angusat apparsaataapput.
2017-imi 5,5 millionit koruuninik angusaqarsinnarluni ukioq manna 4,2 millionit koruuninik angusaqarfiuvoq.
Akunnittarfiup angusamigut kinguariarfiunera pisortaqatigiinnit isummerfigineqanngilaq, oqaatigaalli suliffeqarfissuup ingerlatseqatigiiffiini angusat naammagisimaarneqartut ingerlatseqateqatigiiffiillu "angusaqarluartut".
Hotel Arctic siorna kinguariaateqarfiusoq, Nunatta Angalatitsiviata 2017-imi angusai 5,9 millionit koruuniusinnarlutik siorna angusai 6,7 millionit koruuniupput.