Silaannakkut angallassineq silap ajorneranit eqqorneqarpoq
Silap ajornera Juullikkunni silaannakkut angallassinermik eqquivoq, mittarfiit sermisimanerat pissutaallutik mittarfiit quasarlutik, ilaatigullu aputeqangaatsiarlutik. Air Greenland ullumi taama ilisimatitsivoq.
Ilaasussat ilaat tamanna pillugu annguffissaminnut suli anngutinngillat, Kangerlussuarmi sinerissamilu allami unittooqqallutik. Air Greenlandip pisortaanerata Jacob Nitter Sørensenip Air Greenlandimi sulisut sulilluarnerannik Facebookikkut nersorinnippoq:
- Air Greenlandimi, Mittarffeqarfinni Naviairimilu sulisut pikkorissut tunniusimasullu Juullimi pilluaqqorusuppakka, silap ulluni kingullerni ajornerani sulilluarsimapput. Anorersuarsimavoq, persilertarluni, sialussuarluni, sermernarsimalluni, isikkivilulluni, putsilertarluni mittarfiillu quasarsimallutik. Ilaasussalli sapinngisamik amerlasuut annguffissaminnut anngunnissaat sulissutigisimavaat. Torrak, sulilluarsimavusi, Jacob Nitter Sørensenm, Facebookikkut ilaatigut taama allaaserisaqarpoq.
Ualeq manna angallanneq:
Sisimiunut Sisimiuniillu timmisartuussinissat taamaatiinnarneqartariaqarsimapput, ilaasussallu aqagu timmisartuunneqarsinnaanissaat sulissutigineqarluni. Ilaasussat Sisimiunukartussat 50-it Kangerlussuarmi unnuisariaqassapput.
Nuummi mittarfik aamma sermisimavoq, Dash 8-li siulleq Kangerlussuarmit ataatsimut tanneq qulingiluat nunnissinnaasimavoq, silalu taamaaginnassappat ilaasussat Nuummukartussat ullumi timmisartuunneqarsinnaanissaat naatsorsuutigineqarluni.
Narsarsuarmut timmisartuussinissat, Upernaviullu nalaani timmisartuussinissat aamma taamaatiinnarneqartariaqarsimapput, mittarfiit ilaatigut quasarnerat putserneralu matumani pissutaallutik. Ilaasussat ulluni tulliuttuni timmisartuunneqarnissaat naatsorsuutigineqarpoq.
Kangerlussuarmi mittarfik ullumi ullaap tungaani quasarmat timmisartorsuaq Københavniliartussaq kinguaattoorpoq, Nuummiillu ilaasussat 37-t anngutinngitsoorput, ullunilu tulliuttuni timmisartuunneqarsinnaanissaat naatsorsuutigineqartoq, Air Greenlandip nalunaarutigaa.
