Pituffik Air Greenland isumaqatigiissusioqqippoq
- Nalunaarut ippassaq unnukkut takkummat nuannaaleqaanga, Air Greenland taamaalilluni Pituffimmi suliassat Amerikamiut suliffeqarfiutaannut ukiuni kingullerni tunniunneqartaleraluttuinnarnerannut avaanngunartumut unitsitseqataavoq.
Air Greenland angusarinnerpaajuvoq
- Inernerujumaartoq pissangalluta utaqqigatsigu. Qularutissaanngilaq Pituffimmi suliassiissutinut tunngatillugu nipi aninneqartartoq pissutigalugu isumaqatigiissusiorsinnaanersugut pissanngatigigatsigu, pisortaq Pituffimmi sullissinissamik immakkullu angallassinissamik Amerikamiut suliffeqarfiutaannut isumaqatigiissuteqarsimaneq eqqarsaatigalugu taama oqarpoq.
AAMMA ATUARUK Sakkutooqarfimmut timmisartuussineq USA-p suliariumannittussarsiukkaa
US Air Forcilli Air Greenlandimik suleqateqaannarniarnera pissutissaqarluartoq, Jacob Nitter Sørensen isumaqarpoq:
- Amerikamiut naliliissutigisartagaanni isumaqatigiissutip atuuffiani tamarmi angusarissaarnerpaajuaannaratta, maannamut ilippanaateqartuarsimavugut. Tassalumi suliassaq naammassisinnaallugu takutereerparput.
Sulisut nersugassarsuupput
Isumaqatigiissutillumi naammassilluarsimanera, suliffeqarfiup sulisorissaarneranik pissuteqartoq pisortaaneq erseqqissaavoq.
- Sulisugut Amerikamiunut sullissilluarsimagamik nersugassarsuupput. Aamma inuiaqatigiit kalaallit pilluarlik. Tassami tamatsinnut iluaqutaasussamik sullissinissamik isumaqatigiissusioqqippugut, Jakob Nitter Sørensen oqarpoq.
AAMMA ATUARUK Air Greenland annertunerusumik sinneqartooruteqarpoq
US Air Force-imik isumaqatigiissut 2019-imi januaarip aallaqqaataaniit 2023-imi decembarip naaneranut atuutissaaq. Isumaqatigiissut ukiumi ataatsimi atuuttussaasartussanngorlugu ilusiligaavoq, sivitsoqqittarnissaanilli periarfissaqartillugu.
Jacob Nitter Sørensenip isumaqatigiissut Air Greenlandimut qanoq aningaasannassutaassanersoq oqaatigiumanngilaa.
Isumaqatigiissut tallimanngornermi pisortaq naapertorlugu atsiorneqassaaq.