Air Greenland Hotel Hans Egede A/S-ip pisiarinissaanut isumaqatigiissuteqartoq

Hotel Hans Egede  Helge Tangimit Carl Juhlimillu 1987-mi pilersinneqartoq Air Greenlandimit pisiarineqarnissaanut maanna isumaqatigiissuteqarfigineqarpoq.

Nuummi akunnittarfimmi inissaqarnerup nukittorsarnissaa Kalaallit Nunaatalu ukiuni makkunani ineriartornera aallaavigalugit Air Greenland Hotel Hans Egede A/S-ip pisiarinissaanut isumaqatigiissuteqartoq.

Air Greenland tusagassiuutinut nalunaarummi allappoq.

- Nuuk Kalaallit Nunaallu piorsarneqaleruttorput angalasut amerliartorlutik, aqqutit nutaat pilersinneqarlutik angalanissamullu piorsarnerunissaq pisariaqarluni, Air Greenlandimi pisortaaneq Jacob Nitter Sørensen tusagassiuutinut nalunaarummi allappoq.

Nunanut allanut timmisartorsinnaalernerup, takornariaqarnerulernerup inuussutissarsiornikkullu allisaanerup kinguneranik Nuummi akunnittarfeqarnerup patajaannerulernissaa pisariaqartinneqartoq tusagassiuutinut nalunaarummi allaqqavoq.

Suliffeqarfiup piorsarneqarnissaa pisariaqalertoq

Suliffeqarfiup piorsaqqinneqarnissaanut maanna piffissanngortoq Hotel Hans Egede A/S-imilu siulersuisuni siulittaasup Helge Tangip oqaatigaa:

- Ukiut 76-it qaangereerpakka, suliassallu ikilinissaannut piffissanngorluni. Taamaattumik uannut pingaartupilussuuvoq suliffeqarfiup piorsaqqittuarnissaa anguniarlugu kalaallinit maanna pigineqarluni siunissamut ingerlanneqalernera, Helge Tang allappoq.

Naak Hotel Hans Egede A/S Air Greenlandimit pigineqartussanngoraluartoq, ingerlatsinerit allanngortinneqassanngitsut nalunaarummi allaqqavoq.

Hotel Hans Egede, HHE Express aamma Nuuk Hotel Apartments by HHE Hotel Hans Egede A/S-imit ingerlanneqarput.

Pisinissamullu isumaqatigiissutip oqartussaasunit akuerineqarnissaa apeqqutaajumaartoq, tusagassiuutinut nalunaarummi allaqqavoq.