Agathe Fontain: Aalakoortoqarani nalliussineqarsinnaavoq
Justus Hansen Peqqissutsimut naalakkersuisumut Agathe Fontainimut paragraf 37 naapertorlugu apeqquteqaatinik tallimanik nassiussaqarpoq.
Kommuneqarfik Sermersuumi imigassanik aalakoornartortalinnik nioqquteqartarneq sassaallertarnerlu pillugit Namminersorlutik Oqartussat nalunaarutaat Naalakkersuisut allanngortinniarneraat, Justus Hansenip paaserusuppaa:
- Nalunaarut allanngortinniarlugu Naalakkersuisut pilersaaruteqarpat, ukiup ulluisa 365-iusut ilaanni ullormi ataatsimi immiaararsinissamut inerteqquteqarneq isumaqanngitsoq atorunnaarsinniarlugu Justus Hansen aperivoq.
Taama inerteqquteqarneq pinaveersaartitsinermut arlaatigut iluaqutaanersoq Justus Hansenip aamma paaserusuppaa, soorlu oqartoq, issuaaneq aallartippoq: Imaluunniit pineqaannarpa kaajallannerinnarmi nassaaq tusaqqusaarutigalugu politikki?
Peqqissutsimulli naalakkersuisup Agathe Fontainip tamanna akissutissaqartippaa:
- Tasiilami nunaqarfinnilu tallimaasuni eqqartorneqartuni kommunalbestyrelsiusimasoq meeqqat ulluannut atatillugu nersortarialimmik akisussaassuseqartumillu kissaateqarsimavoq, imigassamik aalakoornartulinnik tuniniaaneq, tassunga ilanngullugit immiaaqqanik, ullormi tassani inerteqqutigineqassasoq, Agathe Fontain allappoq, nangillunilu:
- Inerteqquteqarnerup atorunnaarsinnissaanik Naalakkersuisut pilersaaruteqanngillat. Ilanngullugu Naalakkersuisut isumaqanngillat inerteqquteqarneq suusupaginninnerusoq, eqqarsaatigigaanni meeqqat ulluanni meeqqat atugarisaannik mianerinninnissaq pillugu illersorneqarsinnaammat, Peqqissutsimut naalakkersuisoq allappoq.