Afghanistanimi nunap sajunnerani inuit 2000-it ajunaarput
Arfininngornermi afghanistanimi nuna sajummat, inuit 2000-it ajunaarput, taama nutaarsiassaqartitsivik dpa allaaserinnippoq.
Afghanistanimi naalagaaffiup oqaaseqartartuata oqaaseqannginnerani, ikinnerpaamik inuit 1000-it ajunaarsimasut, nutaarsiassaqartitsivimmit AFP-mit nalunaarutigineqarpoq.
FN paasissutissiinera naapertorlugu, arfininngornermi inuit 320-it toqusimasutut nalunaarsorneqarsimapput.
Herat, nunap sajunneranik eqqorneqarnerpaavoq, nunaqarfiit arfineq marluk sequmivissorsimapput.
Aghanistanimi Talibanit aqutsipput, maannamullu nunap sajunnerani 15-iinnarnik junaartoqarsimaneranik nalunaaruteqarsimapput.
Nunap sajunnera siulleq, Heratsimi arfininngornermi pisoq, nunap sajunnerani uuttortaat malillugu 6,3-mi inissisimasimavoq.
USA-p nunalerinermut misissuisarfia nalunaaruteqarpoq, nunap sajorujussuareernerata kingornata malitsigisaanik, sakkortuumik nuna sajoqattaaqqissimasoq.
Farah aamma Badghis nunap sajunneranittaaq sakkortuumik eqqugaapput, taama Afghanistanimi ajunaarneqartillugu oqaaseqartartuat nalunaaruteqarpoq.
Najungaqarfiit annertuumik sequmissimapput, nunap sajunneranillu nuna sisoorsimasoq nalunaarutigineqarpoq.
Illuni sequmissimasuni inuit matoorussaaqqaapput. Arfininngornermilu nunap sajoreernerani ajunaarsimasut nalunaarutigineqartut, amerliartornissaat oqartussanit ilimasaarutigineqarpoq.
Nunap sajorujussuaqattaarneranit attaveqaatit, soorlu oqarasuaatinut angallattakkat attavigisaat attaveerussimapput. Attaveqannginneq peqqutaalluni ajunaartut, aqqunarsimasut qanorlu nunap sajunnerata, qanoq annertutigisumik sequmissutaasimanera avinngarusimanerusuniittuni naatsorsoruminaappoq.
Qanngorpallassuamik tusaasimapput, iliuuseqarnissamullu periarfissaqanngilluinnarsimavugut, angutit ilaat 42-nik ukiulik, Bashir Ahmed, ajunaarnersuaq pillugu taama oqarpoq.
-Nunap sajunnerata aallartinnerani illut tamarmik uppikaapput, illullu iluiniittut matoorussaapput, tusagassiorfimmut AFP-mut taanna oqarpoq.
Inuit ikinnerpaamik 9000-it, nunap sajunnerani aqqunarsimapput, nunap ajunarnersuaqarnerani oqartussat taama nalunaaruteqarput.
