Afghanistanimi eqqissineqarnissaa pillugu Nuummi malunnartitsiniaasoqartoq

Afghanistanimi eqqissineqarnissaa kissaatigalugu Nuup qiterpasissuani sapaammi malunnartitsiniaasoqarpoq.

John Lennonip erinniaa "Imagine" atorlugu Afghanistan Nuup qiterpasissuani ullumi eqqaaniarneqarpoq.

Inuit 15-20-llu missaanniittut katersuussimapput, Afghanistanimi eqqissineqarnissaa kissaatigineqarluni. Nunat killiit ukiuni Afghanistanimi ukiuni kingullerni 20-ni sakkutuuliivigineqareerluni sakkutuut maanna qimaguupput, taamaalineranilu islamisiortut Talibanit Afghanistanimi pissaaneq tigullugu.

Afghanistanimi pisut malunnartinniarlugit eqqaaniarneqarnissaannut suliniuteqartoq tassaavoq 25-nik ukiulik Tamana Mayel. Taanna Aarhusimi najugaqarpoq, maannalu nakorsanngorniartuulluni.

- Afghanistanimi pisut alianarput. Maluginiarneqarnissaa puigorneqannginnissaallu kissaatigaara, pisullu ilungersunartuunerat eqqaasitsissutigerusuppara. Inuiaqatigiit ajalusoorput, Afghanistanilu kinguariartupiluussaaq. Alianaqaaq, Tamana Mayel, Dronning Ingridip Napparsimmavissuani qaammatini marlunni suliniarluni nunatsinniittoq, oqarpoq. 

Siunissaq nalorninartoq

Afghanistanimiillu ungasissumiikkaluarluni Afghanistanimiut eqqarsaatigineqarnissaat pillugu eqqaaniaasoqarnissaanik aaqqissuussilluni.

- Ungasissorujussuarmi pisoqaraluartoq qanittutut misigimanarpoq. Attortisimaqaanga. Aliasuppunga. Assillu Afghanistanimeersut takugaangakkit aliasulersarpunga. Soriarsinnaanngitsutut misigisimavunga. Uangali Afghanistanimit qimagullunga periarfissagissaarnerulerpunga, ilinniarsinnaallunga. Maanna Afghanistanimiut periarfissagissaarpallaarunnaassapput. Arnat angutillu periarfissaat killeqalissallutik. Siunissaq nalorninartoq, Tamana Mayel oqarpoq.

AAMMA ATUARUK Inuit 9000-t Afghanistanimeersut USA-meersunit qimagutitinneqartut

Sermersuaq inoqajuitsorlu

Naallu siunissaq nalorninartortaqaraluartoq Afghanistanimiut maanna aqutsisorilikkaminnut illuatungiliillutik iliuuseqarnissaat Tamana Mayelip neriuutigaa.

- Neriuppunga innuttaasut pisinnaatitaaffitik sorsuutigissagaat, arnat ilinniarsinnaatitaallutillu inuttut allatut pisinnaatitaaffeqalernissaat, kiffaanngissuseqarlutillu inooqataasinnaanissartik sukataarutigissallugu, taanna oqarpoq.

AAMMA ATUARUK Afghanistanimit danskit qimagussorneqarsimanerat misissoqquneqartoq

- Inuit tapersersuisut qutsavigaakka. Isumaqartorujussuuvoq. naallu Afghanistan Kalaallit Nunaannit ungasissorujussuarmiikkaluartoq inoqatiminnik pingaartitsisoqarpoq, Tamana Mayel KNR-imut oqarpoq.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl