Afghanistanimit danskit qimagussorneqarsimanerat misissoqquneqartoq
![](/sites/default/files/styles/image_934x467/public/article_images/20210811-155051-l-1920x1280we.jpg?itok=7HGZ7rJJ)
Danmarkimi innuttaassusillit, Afghanistanimiullu Danmarkip naalagaaffeqarfianik sullissisimasut Afghanistanimit sooq taama aatsaat kingusitsigisukkut qimagussorneqarsimanerisa misissorneqarnissaa Danmarkimi partiit arlallit kissaatigaat.
Tusagassiorfiit assigiinngitsut marlunngornermi taama allaaserisaqarput.
Sooq taama kingusitsigisukkut aatsaat qisuariartoqarnersoq SF-ip Enhedslistenillu apeqquserpaat, tamannalu misissorneqarnissaa kissaatigalugu. DR taama allaaserisaqarpoq.
AAMMA ATUARUK Afghanistanimiut 640-t sakkutuut timmisartuanik ilaallutik Kabulimiit annaanneqartut
Suut misissuivigineqartariaqarnersut SF-ip oqaatigisinnaanngikkallarpaa, politikkikkullu qanoq kinguneqartariaqarnersoq Enhedslistenip maannamut oqaatigerusunnagu.
Partii Venstreli oqaaseqarusuppoq. Arlaannaannulluunniimmi attuumassuteqanngitsunit misissuisoqartariaqartoq Venstre isumaqarpoq.
Venstrep nunanut allanut tunngasunut oqaaseqartartua Michael Aastrup Jensen taama oqarpoq:
- Sukumiisumik misissuisoqartariaqarpoq. Assersuutigalugu sooq aatsaat taama kingusitsigusukkut qisuariaateqartoqarnersoq misissorneqartariaqarluni. Qimagussuisoqarnissaa illersornissaqarfiup ilaata aamma kissaatigaa, ilaatigut itigartinneqarluni. Tamanna aamma misissuiffigineqartariaqarpoq, Michael Aastrup Jensen oqarpoq.