Afghanistanimiut 640-t sakkutuut timmisartuanik ilaallutik Kabulimiit annaanneqartut

Afghanistanimiut inuit 640-t Amerikamiut timmisartorsuannut assartuummut useqarluarsinnaasumullu ulikkaavillugu ilaatinneqarlutik, Kabulimiit sapaatiummat kingusissukkut aallarunneqarput taamaalillutillu annaanneqarlutik.

Taanna timmisartorsuaq, C-17 Globemaster III-mik taaguutilik, nalinginnaasumik inunnik 134-nik taamaallaat issimasoqarsinnaasoq tallimariaammik ilaasoqartoq, Amerikamiut illersornissaqarfiata nutaarsiassaqartitsivia Defence One allappoq.

Taakku nalunaarutaat naapertorlugu ilaasut taamarsuaq amerlatiginissaat naatsorsuutigineqarsimanngikkaluartoq, Afghanistanimiorpassuilli uiverlutik imminnut qalleraallutik timmisartorsuarmut ikiniupput, taamaalillunilu timmisartorsuaq ulikkaarpallaarujussuarlugu.

Inuppassuit timmisartumut iluatsitsillutik ikisut timmisartorsuup usisarfiani tattoqisaallutik naatiffissarsiorlutillu issiffapput. Timmisartoq tassanngaaniit Qatarimut aallarpoq.

AAMMA ATUARUK Danmark Afghanistanimiunut ikiuutissanik 100 millionit koruuninik tapiisoq

Sapaatit akunnerini arlalinni islamisiortunit pikitsitsisoqareersoq Afghanistanip illoqarfiisa pingaarnersaat Kabul sapaatiummat Talibaninit tiguarneqarpoq, taamaalillutillu Afghanistanip annersaa aqulerlugu.

Tamatuma kingunerisaanik Kabulip timmisartoqarfissuani inunnik qimarranniartunik uivernersuaqalerpoq.

Timmisartoqarfissuaq taanna ippassaq ataasinngormat unnukkut arfineq-pingasunut matuneqartoq, nutaarsiassaqartitsivik AFP allappoq.

Videoni takuneqarsinnaavoq pisoq qanoq sakkortuginersoq, inuppassuimmi imminnut majuarfigisarlutik timmisartumut ikiniuttut takuneqarsinnaammata.