Danmark Afghanistanimiunut ikiuutissanik 100 millionit koruuninik tapiisoq
Afghanistanimiunut ikiuiniarnissaq maanna pisariaqartinneqarluinnartoq, danskit ineriartortitsinissaq pillugu ministeriat Flemming Møller Mortensen isumaqarpoq.
Taamaammat Danmark maanna Internationalt Røde korsimut, nunat tamalaat Røde Korsiannut, aammalu Naalagaaffinnut peqatigiinnut, tassa FN-mut, 100 millioni koruuninik tunissuteqarpoq.
Aningaasallu taakku Danmarkimi ineriartortitsinissaq pillugu ikiuutininngaanneersuupput.
- Afghanistanimi pissutsit maanna puullaaqinartorujussuupput, Flemming Møller Mortensen tunngavilersuivoq.
Afghanistan nunanut allanut sanilliullugu Danmarkip annerpaamik, ukiumut 400 millioninik tapiiffigineqartarnera, ukiuni siuliinili tapiiffiginerusartagarigaa, Flemming Møller Mortensenip malugeqquaa.
AAMMA ATUARUK Danskit illersornissaqarfiata danskit Afghanistanimiittut angerlartikkaat
Talibanimiut pikitsitsiniat ippassaq pissaanermik tiguaanerisa kingunerisaanik Afghanistanimi ikiugassat sualutsikkiartuinnarput, ilaatigummi inuppassuit uiverlutik nunaminniit qimarranniartorpassuupput.
Aningaasat tunniunneqartut Afghanistanimut taassumalu eqqaaniittunut atorneqassapput.
Afghanistanermiut 5 millionit missaanniittut maanna nunaminniit qimarrapput. Tusarfiillu tutsuiginartut naapertorlugit qimaasut millionit affaannik amerlassuseqalerumaartut naatsorsuutigineqartoq oqaatigineqarpoq.
Afghanistanermiut 2,5 millionit sinnerlugit qimaasimasutut maanna allattorsimasuutigineqarput. Taakkunannga amerlanersaat Afghanistanip killeqarfianiittunut Parkistanimut Iranimullu qimaapput.