Advokati: Greenpeace pinerluttuliunngilaq
Avatangiisinik illersuiniaqatigiiffimmit Greepeacemeersut Cairn Energyp qillerivissuanut qallorlutik immimmut qilersuunnerat pinerluttuliornerusoq, Demokraatit sinnerlugit Inatsisartuni ilaasortaq Anda Uldum tusagassiuutinut nalunaarummini qanittukkut saqqummersuni ilaatigut oqarpoq.
Kisianni tassa avatangiisinik illersuiniaqatigiiffik Greenpeace pinerluttuliortutut taaneqarsinnaanngitsoq, advokati Aviaaja Helms oqarpoq.
- Greenpeacermiut tigusaallutillu nunatsininngaanniit anisitaasut pinerluttulerinermut inatsimmik unioqqutitsisutut eqqartuussaanngillat, kisiannili malittarisassanik Inatsisartullu peqqussutaannik unioqqutitsisimasutut eqqartuunneqarlutik, Aviaja Helms oqarpoq.
Pinerluttulerinermut inatsit unioqqutinneqarpat pinerluttuliornertut naatsorsuunneqartarput.
- Inatsisilerinermi inatsisit peqqussutillu naligiipput, kisianni inatsisinik unioqqutitsisutut eqqartuunneqaraanni taava pinerluttulerinermut inatsit tassaavoq unioqqutitani sakkortunerpaaq, tassa malittarisassat pinerluttulerinermut inatsimmiit aamma Inatsisartut peqqussutaanniit appasinnerupput,Aviaaja Helms oqarpoq.
Greenpeacekkuni ilaasortat arfineq-marluk nunatsinnit ullumikkut anisitaapput.
