Marthap siunnersuutaa eqqartuussissuserisumit akuerineqarpoq
Siunnersuut 2014-imi 2015-imilu nakkutilliinermik nalunaarusiani, pingaartumik Qaasuitsup Kommuniani, meeqqat sumiginnakkat pillugit pissutsinik ilungersunartunik toraagaqartoqartarsimaneranut politikkikkut qisuariaataavoq.
Siunnersuut Kommuneqarfik Sermersuumit KANUKOKA-miillu isornartorsiorneqangaatsiareersorlu qaammat kingulleq kinguartinneqarpoq.
Naalagaaffiup inatsisilerituuata siunnersuut nalilersuiffigereerlugu, kommunit pisussaaffigisaminnik naammaginanngitsumik ingerlatsisutut naliliiffigineqarpata, Naalakkersuisut suliassanik tigusigallarsinnaanerisa inatsisiliornermut naapertuunnera maanna naqissuserpaa.
Aamma atuaruk Martha Lund Olsenip siunnersuutini kinguartippaa
Siunnersuutip isornartorsiorneqarnerani oqaatigineqartut ilagaat inatsit kommunit namminneq aalajangiisinnaassuseqarnerannut unioqqutitsissasoq, soorlu tamanna aamma tunngaviusumik inatsimmi allassimasoq. Naalagaaffiulli inatsisilerituuata oqaatigaa tunngaviusumik inatsimmi immikkoortumi tassanerpiaq atuarneqarsinnaasoq kommunit inatsisiminnik namminneerlutik aqutsinissaminnut pisinnaatitaaffeqarnerat naalagaaffiup nakkutilliinerata ataaniittoq.
Naalagaaffiup inatsisilerituua naapertorlugu, innuttaasut inatsisitigut isumannaatsumik inissisimanissaat immikkoortumi pineqartumi qulakkeerniarneqarpoq. Kommunimmi pisinnaatitaaffii pineqaratik innuttaasut pisinnaatitaaffii pineqarput, Naalagaaffiup inatsisilerituua taama allappoq.
- Kommunit naalagaaffimmit nakkutigineqarput, aamma kommunit piginnaatitaaffimminnik inatsisit naapertorlugit isumaginnissinnaanngippata naalagaaffik iliuuseqarnissaminut pisussaaffeqarpoq, Karsten Hagel-Sørensen, Naalagaaffiup Inatsileritooqarfianeersoq naliliinermini taama allappoq.
Aamma atuaruk KANUKOKA siunnersuummut isumaqataanngilaq
Taamatullu naliliisoqarnera naalakkersuisup Martha Lund Olsenip nuannaarutigaa.
