Martha Lund Olsenip siunnersuutini kinguartippaa
- Arlaatigut naammagittaalliortoqarsimatillugu tusaaniarnissarput pingaaruteqartutut isigaara, qinersimavaralu siunnersuutip piviusunngortinniannginnerani inatsisilerituunnit kikkunnulluunniit attuumassuteqanngitsunut misissortilluaqqissaassallugu, Martha Lund Olsen allappoq.
Kommunit kattuffiata KANUKOKA-p Kommuneqarfik Sermersuullu siunnersuummut isornartorsiuingaatsiareernerata kingorna Martha Lund Olsenip siunnersuutini peerallarpaa. KANUKOKA Kommuneqarfik Sermersoorlu siunnersuut kommunit nammineertuunerannut innarliissasoq isumaqarput.
Aamma atuaruk Martha Lund Olsen: Suleqatigiinneq pinngitsaaliineq pitinnagu
Isumaginninnikkut nakkutilliisitat ukioq kingulleq kommunit ingerlatsiveqarfiinik misissuiartortarsimanerminni ingammik meeqqat inuusuttuaqqallu sumiginnakkat pillugit annertuumik qarsupittumik suliariniarneqartarsimasunik toraagaqartarnerup kingorna siunnersuut suliarineqarsimasoq, Martha Lund Olsen nassuiaavoq. Inatsisissatullu siunnersuutip Naalakkersuisut akulerussinnaanissaannik ajornannginnerulersitsissaaq.
Naalakkersuisut inatsisissatut siunnersuut aqqutigalugu periarfissinneqarusussimapput, paasisani pissusissamisuunngilluinnartunik toraagaqartarsimanertik toqqammavigalugu akulerussinnaasalernissamut.
Aamma atuaruk Martha Lund Olsen: Kommunit isumaginninnermut tunngasut akisussaaffigaat
Inatsisit maannakkutut isikkoqartillugit, Naalakkersuisut periarfissaqanngillat toqqaannartumik iliuuseqassallutik, assersuutigalugu kommunit meeqqat atornerlunneqarsimatillugit iliuuseqarsimanngikkaangata avaqqullugit akuleruttarnissamut Naalakkersuisut pisinnaatitaaffeqanngillat. Tamannalu inatsisissatut siunnersuusiornermi allatut aaqqiiviginiarsimagaluarlugu, Martha Lund Olsen erseqqissaavoq.
- Meeqqat pineqartut imatut kinguneqarsinnaasarlutik taakkua innuttaasutut pisinnaatitaaffimminnik arsaarneqartartut aammalu kingorna ilinniagaqalernissamut toqqissisimanartumillu inooqataanissamut periarfissarisaat innarliivigineqartartut. Pissutsit tamakku inuiaqatigiittut akuersaarsinnaanngilluinnarpagut, Martha Lund Olsen oqarpoq.
Aamma atuaruk KANUKOKA siunnersuummut isumaqataanngilaq
Naalakkersuisoqarfinni piaartumik inatsisilerituut sumulluunniit attuumassuteqanngitsut siunnersuutaasimasoq pillugu nalilersuitinniarlugu Martha Lund Olsen nalunaarpoq. Tamannalu piareerpat inatsisissatut siunnersuut saqqummiukkumaarpaa.
Kommunit akerliugaluartut meeqqat oqaaseqartartuata suliniaqatigiiffiullu Meeqqat Ikiortigit Naalakkersuisut siunnersuutaat tapersersorpaat.