Qitornavissiartaarnermut inatsimmi nunatsinni ileqqut malinneqarput

Nunatsinni qitornavissiartaartarneq immikkorluinnaq ittuuvoq. Tamanna danskit Isumaginninnermut ministereqarfiata paasilluarsimavaa.

Qitornavissiartaarneq pillugu inatsimmi allassimalersussami, Inatsisartut eqqartugassaanni, nunatsinni qitornarsiartaartarneq pillugu ileqqoq - tassalu qitornarsiartaap angajoqqaamilu akornanni attaveqatigiittarneq takunngitsoorneqarsimavoq.

Tamanna pillugu meeqqat pillugit peqatigiiffiit nikussaartsinneqarsimapput. Meeqqat pillugit siunnersuisoqatigiit tamakkununnga ilaavoq.

Inatsisartunut oqaluuserisassanngortinneqartoq aallaqqaammut danskit inatsisaannut assingusorujussuusutut isigigitsik tassani oqaaseqartartoq William Krigel oqaluttuarpoq.

Qitornavissiartaatitsisarneq Danmarkimi Nunatsinnilu assigiinngillat

Ajornartorsiut uaniippoq danskit inatsisaanni meeraq qitornavissianngortinneqaraangat angajoqqaat meeqqaminnut qitornarsiaasimasumut attaveqarsinnaanerat ajornakusuungaatsiartarmat.

Kalaallit Nunaannili qitornavissiartaartitsisarneq allarluinnaavoq.

- Ilami Kalaallit Nunaanni qitornavissiartaartitsisarnerit amerlanerpaat ammasuusarput. Imaappoq angajoqqaajusut angajoqqaarsianngortullu, ilaatigullu meeraq pineqartoq tamarmik imminnut ilisarisimasarlutik. Amerlanerpaatigut Kalaallit Nunaanni taamaattoqartarpoq. Nunatsinni tamanna immikkoorutigaarput.

Ileqquusunut ilaavoq meeqqat tunissutinik taaneqartartut.

- Qitornavissiartaarnerit aaqqissuussat, angajoqqaajusut angajoqqaarsiarngortussallu meeravissiartaarneq akunnerminni isumaqatigiissutigalugu. Taama aaqqiisimasut amerlapput. Inuiaqatigiillu ikittunnguusarmata inuit imminnut ilisarisimasarput.

Immikkuullarissutut taaneqarsimavoq

Inatsisip oqaasertassaani ministeriaqarfiup ileqqoq tamanna ilannguttariaqarsimavaa. Kalaallit ilaqutariinnermut atasumik inatsisaanni immikkuullarissutut taaneqarsimasoq, Danmarkimimi inatsisit atorneqartut assileqqissaarneqarsimagaluarput.

Tamannalu nuannaarutaaqaaq.

- Isumaqarpugut pingaaruteqartoq meeqqap kingoqqiffini ilisimallugit alliartornissaa, taakkulu attaveqarfigisinnaallugit. William Kriegel naggasiivoq.

Inatsisissatut siunnersuut Inatsisartuni marsip 25-ianni oqaluuserisassanngortinneqarsimavoq.

Inatsit akuerisaassappat angajoqqaat qitornavissiartaartitsisimasut meeqqap attaviginissaa ilaginissaalu qinnuteqaatigisinnaalissavaat.