ADHD-mut nakorsaatit atugaasorujussuanngorput
Kalaallit meerartaasa 1 procentiisa missaat ADHD-mik nappaateqarput. Peqqissutsimut Naalakkersuisoq Agathe Fontain taama ilisimatitsivoq.
Paasissutissaq tamanna saqqummiunneqarpoq Inuit Ataqatigiinneersoq Olga P. Berthelsen paragraf 37 naapertorlugu Naalakkersuisunut apeqquteqarmat.
Tassani ilisimatitsissutigineqarpoq Nunatsinni meeqqat inuusuttullu 160-it missaat ADHD-mik nappaateqartut paasineqarsimasoq. ADHD-mik nappaatip atugaanera Inatsisartut upernaamut katersornissaanni aamma sammineqassaaq "Tarnikkut nappaatilinnik sullissinermut tunngasut pillugit nassuiaat 2010" saqqummiunneqarpat.
- ADHDp qanoq atugaatiginera naapertorlugu iliuusissatut periusissatullu immikkut pilersaarummik aallartitsinissamik peqqinnissaqarfik pilersaaruteqanngilaq, Agathe Fontain Olga P. Berthelsenimut akissummini allappoq.
Kisitsisit aamma takutippaat ADHD-mut nakorsaatinik atuineq ukiut arlaqanngitsut ingerlanerinnaanni qaffariarujussuarsimasoq.
ADHD-muit nakorsaatit 5.960-it 2002-mi tunniunneqarsimapput 2008-milu 25.240-nut amerleriarsimasut, Agathe Fontain nalunaarpoq.