ACR peqataasussanut 106-inut piareertoq
ACR-imillu aaqqissuisut piariingajalernerarput, unammisoqarneratalu nalaani atugassarissaartoqassasoq siulittorlugu.
Ukioq manna Arctic Circle Racertoqarnissaanut piareersagassat tamakkingajalerneqarput, peqataasussallu 100-t sinnillit Sisimiut timaani unammiuaarnissaat piviusunngorsinnaangajalerluni, Jens Klaus Lennert, ACR-imi siulittaasuusoq oqaluttuarpoq.
- Piariingajalerpugut. Campeqarfissaq piariingajalluinnalerpoq. Taamatullu aamma arpaffissaat tamakkerlugu sillimaniarmernik isumagisaqartut ippassaq misissorpaat. Taamaalillugu aamma taannartaa qulakkeerneqarpoq.
Ukioq manna peqataasussat 106-iusut nunanit assigiinngitsunit 14-neersut unammiffiusussani 160 aamma 100 kilometerinik isorartussusilinni ulluni pingasuni unammiuaassapput. Peqataasussallumi Sisimiunut tikeraleruttortut Jens Klaus Lennertip oqaluttuaraa.
- Arpattut nunani allaneersut amerlanerit tikerareerput. Taava sinneri ullumikkut aqagulu tikerartussaapput.
Sisorarfiussussarlumi peqataasussarpassuit aliannaarsaarfigissajunnarsivaat. DMI-mmi ilimasaarutaa naapertorlugu ulluni unammiffiusussani silaginnissaa ilimasaarutigineqarpoq, naak issikujunnissaa aamma ilimasaarutaagaluartoq.
- Silap kiassusaa imaluunniit ississusaa eqqarsaatigissagutsigu aallarfissaata nalaani minus 20 angusarsinaavaa, arfininngorneq sapaallu nillernerulaarlutik.
Arfininngorpat issinnerulaaleqqissaaq, anorlikujunnissaali aamma ilimagineqarnani.