Aatsitassat pillugit suleqatigiinnerunissaq
- Kalaallit Nunaanni piviusoq pillugu Danmarkimi paasinnittaatsip siuarsarneqarnissaanut arlalinnik suliniuteqarpugut. Danskit aningaasaliisartut suliffissuillu Kalaallit Nunaanni sulianut nutaanut eqeersimaarnerusumik peqataanissaannut arlalinnik suliniuteqarluta qaniorpagut. Inuussutissarsiornermullu naalakkersuisoqarfitta akornanni suleqatigiissitanik ataatsimoorussatsinnik pilersinitsiniarluta ullumi isumaqatigiissutigaarput, Kuupik Kleist ullumi ataatsimiinnerup kingorna Statsministeriaqarfimmi tusagassiortunik katersortitsinermi oqarpoq.
Taamatut suleqatigiissitaliortoqarnissaanut siunnersuut Kuupik V. Kleistip ujarassiuullu Minik Rosingip Politikenimi novembarip qaammataani ataatsimoorlutik allaaserisaanni siullerpaamik saqqummiunneqarpoq. Siunnersuullu taanna ullumi timitalerneqarpoq.
- Ataatsimiititanik taama ittunik pilersitsisoqarnissaa piareersimaffigaarput aammalu maannakkorpiaq pisariaqartitatsinnut - danskit suliffeqarfiisa suliffissuillu Kalaallit Nunaannik soqutigisaqarnerulernissaannut periarfissinnissaannut - ikiuutaasinnaasumik aqqutissiuisinnaagsumillu ilusiliamik pitsaasumik nassaarluta, statsminister Helle Thorning-Schmidt oqarpoq.
- Maani Danmarkimi Kalaallit Nunaat pillugu ilisimasaqartupilussuuvugut. Imaasinnaavoq tamanna pitsaanerulersinneqarsinnaasoq, tamatumunngalu soorunami ikiuukkusuppugut, Helle Thorning-Schmidt oqarpoq.
Inuussutissarsiorneq pillugu suleqatigiissitat saniatigut aamma danskit kalaallillu nunanut allanut tunngasunut ataatsimiititaliaannik pilersitsoqarpoq, tassanilu suliani aatsitassanut tunngasuni - Kalaallit Nunaata oqartussaaffigisaani - sillimaniarnermut tunngasut - Danmarkimit oqartussaaffigineqartut - eqqartorneqartassapput.
