Aatsitassarsiornerup unikaallannissaa naalakkersuisut kissaatiginngilaat
![](/sites/default/files/styles/image_934x467/public/article_images/cairn_ryg_630_6.jpg?itok=7HsTai_D)
- Aningaasaleerusukkunik aningaasaliiniaqillit, kisianni naatsorsuutigineqassanngilaq uagut pisortatigoortumik aningaasaliinermut taama ittumut peqataassasugut, Naalakkersuisut siulittaasuat, Kuupik V. Kleist oqarpoq.
Dansk Folkepartiip siulittaasuata, Kristian Thulesen Dahl-ip siunnersuutigaa, danskit suliffeqarfissuisa, oqartussanit pigineqartut suleqatigiinnerisigut, Nunatsinni aatsitassarsiornerit Danmarkimit peqataaffigineqarpata, taava Nunatta Danmarkillu tamanna annertunerusumik pitsaanerusumillu nakkutigilersinnaassagaluaraat.
Taamali siunnersuuteqarneq Naalakkersuisunit taperserneqanngilaq, oqarlutilli piumagunik ingerlatsivissuarmik aallartitsisinnaasut, taamaattorli allatulli aallartitsiniartutut atugassaqartinneqarnissartik naatsorsuutigisinnaagaat, Kuupik V. Kleistip oqaatigaa.
- Danmarkimi aningaasaliisussat kattussuukkusukkunik imaluunniit Danmarkimi soqutigisat illersorniarlugit iliuuseqarniarunik soorunalimi taamaaliorsinnaapput, tamannalu uagut unitsissinnaanngilarput. Kisianni tamanna pissutigalugu Nunatsinni pisussat kinguarsarniarneqassappata, taava tamanna illuatungilissavarput, Kuupik V. Kleist oqarpoq.
Dansk Folkepartiip siulittaasuata, Kristian Thulesen Dahl- ip siunnersuuteqarneranut toqqammiviusut ilagaat, ingerlatsivissuit angisuut aatsitassarsiornissaannut atatillugu, sulisartunik nunanit allamiunik akikitsunillu sulisoqarsinnaanissaat, suliniutit angisuut pillugit inatsimmut ilanngunneqarsimammat, taamaalilluni sulisartut nunat allamiut, Nunatsinni sulisartut nunaqavissut akissarsiaannit ajornerusumik atugassaqartitaalersussaammata, tamanna Kalaallit Nunaata nunanit allanit isigineqarnerlunneranik kinguneqarsinnaasoq oqaatigalugu.
- Folketingip nunanit allaninngaanniit suliartortartussanik ajornannginnerusumik allaffissornikkut suliaqarnissamik inatsimmik allanngortitsisariaqarnerminni, una siunnersuut kimingiisernermut atorpaat, ilaatigut Danmarkimi naalakkersuisuusunut illuatungiliunnerminni sakkuginiartutut atorlugu, tamannalu uangut nuannarinngilarput, Kuupik V. Kleist oqarpoq.
- Nunatsinni pisuussutit namminneq pigisamittut pissuseqarfigalugit taamatut akimmisaartitsiniarsarinerat aammalu makunniunnerminni Nunatsinni aningaasarsiornerup pisariaqavissumik annertusaavigineqartariaqarnerata kinguarsarniarneqarnera akueriuminaatsutut uanga oqaatigisariaqarpara, Naalakkersuisut siulittaasuat, Kuupik V. Kleist taama oqarpoq.
Pinngortitaq pillugu nunarsuaq tamakkerlugu suliniaqatigiiffiup, WWF-ip genralsekretæriata, Gitte Seebergip, danskit pilersaarutaat taperserlugu allappoq, danskit aningaasanik milliardilikkaanik aningaasaliinerisigut, Nunatsinni aatsitassanik piiaanermi avatangiisit mingutsinneqannginnissaat anguneqassagaluarmat, taama eqqarsarneq iluatigineqartariaqartoq.