Aatsitassarsiornermi ilisarisimaneqarluartoq Hudson Resourcesimi pisortanngortoq

Kangerlussuup eqqaani anorthositimik piiaasartup Hudson Resourcesip, Bent Olsvig Jensen pisortatut atorfinitsippaa.

Bent Olsvig Jensenip nunatsinni aatsitassanik piiaanermi sulineq misilittagaqarfigilluarpaa. Xploration Services Greenlandimi, nunatsinni aatsitassaqarneranik misissuisunut atortussanik sulisussanillu isumaginnittartuusumi ukioq manna pisortaajunnaarpoq, coronap ajornartoortitsinera suliffeqarfimmut aningaasarliortitsimmat. Bent Olsvig Jensen pinnersaasiorfimmi Greenland Rubymi pisortaanikuuvoq.

Bent Olsvigip Jim Cambon pisortatut kingoraartigissavaa, taannali piiavimmi suliinnassaaq siuarsaanermik ukkataqarnerulissalluni.

- Bent Olsvigip Hudson Greenlandimi suleqataalernissaa nuannarutigingaarpara. Nikinnerput pisariinnerpaanissaa anguniarlugu Bentilu qaammatini tulliuttuni qanimut suleqatigiissaagut, Jim Cambon oqarpoq.

Anorthosit qalipaasiornermut, glasfiberiliornermut kuldioxideqanngitsumillu betoniliornermut atorneqarsinnaavoq.