Aatsitassarsiorneq aningaasaqarnerlu pillugit nalunaarut saqqummiuppaat
Ingerlatsivissuit pilersaarusiaat piviusunngortussanngorpat, nalunaarusiami qitiutinneqartut ilaat tassaasoq, piginnaanngorsaanerup pilersikkiartornera, politikerinit sillimaffigineqarluni oqallisaalluarumaartoq, Kalaallit Nunaanni Sulisitsisut peqatigiiffiata pisortaa, Brian Buus Pedersen neriuppoq.
- Pilersaarutit piviusunngortikkiartornerannut atatillugu, piginnaanngorsaanerit pilersikkiartornerat, Nunatta politikerinit eqqumaffigineqarluni oqallisaajumaartoq neriuutigaara. Politikerit inatsisitigut aalajangeeqataassagunik, pilersaarusiorluakkamik eqaatsumillu IBA-anik ingerlatsisoqarnissaa siunertarisariaqarpaat, Brian Buus Pedersen oqarpoq.
Taassuma oqaaseq atungaa IBA-at, tassaavoq isumaqatigiissut anguniakkanik pisussaafiliisoq innuttaasut suliffeqarfiillu nunaqavissut uuliasiornermit imaluunniit aatsitassarsiornermit qanoq pissarsitiginissaat. Innuttaasut ataasiakkaat suliffissaqarnissaat suliffeqarfeeqqallu namminersortut suliassaqartinneqarnissaat, salliutinneqarnissaat pinngitsaaliinikkut anguniarneqartariaqassappat tamanna ajoqutissaqanngitsoq nalunaarusiami aamma allassimavoq.
Nalunaarusiap saqqummiunneqarnerani tusarnaariartut ilagaat, London Mining-ip tusagassiisartua, Kaj Kleist. Taassuma nalunaarusiaq ataatsimut isigalugu ajorinngilaa, kisianneqartilluguli. Kaj Kleist tamanna pillugu ima oqarpoq.
- Isornartorsiuinertut oqaatigissanerlugu naluara, kisianni nalunaarusiami uani ersersinniakujunneqarpoq, aatsitassarsiornermik suliffeqarfiit assigiinngitsut uumasorujuttut piumassuseqanngitsutullu taaneqarmata. London Miningimi uangut oqarluartaarutigaarput, Nunarput pillugu nunatsinni. Taamaattumik piareersimavugut Naalakkersuisunut kommuninullu isumaqatigiissusiornissatsinnik, Kaj Kleist oqarpoq.
Tusarnaarianuttaaq ilaavoq, Aningaasaqarnermut Naalakkersuisoq, Maliina Abelsen. Ingerlatsivissuit annertuut suli oqallisaanerulernerat Maliina Abelsen nuannaarutigaa.
- Oqaatigisariqarpara nalunaarusiap saqqummiunneqarnerani tupaallatsinneqannginnama. Taamaattorli nuannaarutigaara pilersaarutit piviusunngortinneqarnissaat ullutsinni oqallisaaqisut, iluamik ajunaarutaanngitsumillu aningaasarsiutigineqarnissaa qanoq iliuuseqarfigissallutigu.
- Qanoq piginnaanngorsaanerit ingerlanneqassappat qanorlu siunissaq ungasissoq isigalugu nunaqavissut suliffissaqartuarnissaat pilersaarusiussavarput. Aningaasaqarnermut Naalakkersuisoq Maliina Abelsen taama oqarpoq.
