Aatsitassarsiorneq aalisarnerlu ingerlaqatigiissinnaapput

- Aatsitassarsiorluni pilersaarutit Uummannami eqqaanilu innuttaasut paaserusulluinnarpaat, Kuupik Kleist oqarpoq, atsitassarsiorfimmi qanoq ililluni sulisinnaanngorluni ilinniartoqarsinnaanersoq soqutigineqarluartoq aamma oqarluni.

- Kissaatigineqarnerpaat ilagaat tuluttut oqaatsinik ilikkarnerunissaminnut sunik periarfissaqarnerlutik, siunissami aatsitassarsiulerfissami suliffeqalernissaminnut taamaalillutik periarfissarissaarnerulissagamik, Kuupik Kleist aamma oqarpoq.

Aatsitassarsiuleqqinnissamut piffissanngortoq innuttaasut amerlaqisut aamma oqaatigisarpaat.

- Taamani aalisarnermik piniarnermillu inuussutissarsiuteqarneq Maarmorilimmi aatsitassarsiorfittulli ingerlanneqarallarnerat utoqqaat aalisartut piniartullu eqqaamavaat. Ataatsimullu isigalugu isumaqarput sooq maannakkut iluatsittumik taamaaliortoqarsinnaassannginnersoq, Ove Karl Berthelsen oqarpoq.

Aalisarneq pillugu inatsit nutaaq innuttaasunik ataatsimeeqattaartitsinerni aamma oqallisigineqartaqaaq, qaleralittassiissutit ilanngullugit. Ane Hansenip innuttaasunik ataatsimiititsinerni pingaartumik maluginiarpaa, Pinngortitaleriffimmi uumassusilinnik misissuisut Uummannarmiut qaninnerusumik oqaloqatigisarumagaat.

- Aalisartut amerlaqisut uumassusilinnik misissuisunit annertunerusumik paasissutissinneqarusuttut oqaloqateqarusuttullu maluginiarpara, tamatumalu piviusunngortinneqarnissaa qilanaaraarput, Ane Hansen oqarpoq.

Innuttaasunik ataatsimiititsinerit Qaarsuni ullumi ulloqeqqata kingorna nalunaaqutaq ataatsimut naggaserneqassapput.