Aatsitassarsiorfiup australiamiunit pigineqartup Energy Transition Mineralsip nunatsinnit Danmarkimillu taarsiivigineqarnissaminut piumasaqaatini naatsorsoreerlugit 76 milliardit koruuninut taggippaat.

Aatsitassarsiorfik tusagassiutinut nalunaarummi taama allappoq.

Piumasaqaat marlunnut avinneqarpoq. Taarsivigineqarnissamik piumasaqaat 50 milliardit koruuninut naatsorsorneqarpoq. Pisullu ingerlanerani kinguaattoornermut ernianut 26,5 milliardit piumasarineqarput.

Aatsitassarsiorfiup Kuannersuarni aatsitassarsiornissamut itigartitaanini naammaginngilaa.

Akuerineqarnissartillu angorusuppaat. Taamaammallu Energy Transition Minerals isumaqatigiissitsiniartartunut nalilersuisussanngortitsivoq.

Piiaanissi suli siunertarigaa

Aatsitassarsiorfilli isumaqatigiissutinik eqquutitsinnginneq pillugu taarsivigineqarnissamut maanna piumasaqanngilaq.

Piiaanissamik akuersissutitaarnissamik sallerpaatitaqarnertik isumalluarnertillu tamatumunnga peqqutaasoq, Energy Transition Mineralsip pisortaanera Daniel Mamadou oqarpoq.

- Piumasaqaateqarnerput iluanaarutiginiarsarinngilarput. Atortussiassaasartunili pissarsiariuminaatsunik pilersuineruniarluta piiaarusuppugut, taanna oqarpoq.

Piiaanissamik akuersissutitaanngikkunik taarsiiffigeqqullutik eqqartuussivilersuinissartik qularnanngivitttoq, taamma aamma oqarpoq.

Aatsitassarsiornissamik suliap nalinga naatsorlugu aatsitassarsiorfik taarseeqqusilluni piumasaqarpoq. Naatsorsuineq immikkut ilisimasallit oqaasii naapertorlugit kisinneqartoq aatsitassarsiorfik allappoq.

Sismanngorneq juunip ulluisa 20-anni maalaaruteqaramilli Danmarkip naalagaaffianit Namminersorlutik Oqartussanillu suli attavigineqarnatik, Daniel Mamadou Ritzauimut oqarpoq.

Urani IA-p qineqqusaarnermi sallertut pingaartikkaa

Australiamiut aaatsitassarsiorfiat siornatigut Greenland Mineralsimik ateqarpoq.

Energy Transition Minerals elektronikkini atortussiassaasartuni pissarsiariuminaatsunik Kuannersuarni piiaalersaaraluarpoq. Piiarnialersaagai uraneqarlutillu zinkeqarput.

Pilersaarutaali Inatsisartunut 2021-mi qinersereernitsinni qatangiinnarput. Inuit Ataqatigiit Kuannersuarni piiaalersaarnermut akerliunertik taamani qineqqusaarnermi sallertut pingaartippaat.

Læs også - Naalakkersuisut bør være meget bekymret

IA taamani qinersinermi ajugaavoq, uranilinnillu piiaasinnaanissap inerteqqutaalernissaanik inatsisissatut siunnersuut Inatsisartuni amerlanerussuteqartut tamatuma kingorna akueraat.

Energy Transition Minerals piiaanissamik tamatuma kingorna itigartitaaavoq.

Itigartitsinerat pigisamik pigiunnaartitsinerusoq uranimullu inatsisitaaq aatsitassarsiornissamik qinnuteqarnermut tunngasuni atunngitsoq, aatsitassarsiorfik isumaqarpoq. Taamaammat 76 milliardit koruuninik taarseeqqusivoq.