Aatsitassarsiorfik tapersersorneqarnissamik pisariaqartitsivoq
Aatsitassarsiorfik Nunaminerals ingerlaannassappat inatsisartut tullissaannik ataatsimiinnissaat sioqqullugu iliuuseqartoqartariaqarpoq.
- Siunissaq qanittoq eqqarsaatigalugu pisariaqartitsivugut aningaasanik nutaanik pinissamut, Nunamineralsimi pisortaq Ole Christiansen oqarpoq.
Nunamineralsip allaffeqarfiani sulisut aalajangersimasut tallimaasimagaluartut maanna marluinnaat sulisorineqarput. Suliffeqarfiullu aappaagu februarip qaammataata tungaanut ingerlanneqarnissaanut taamaallaat akissaqartoqarluni.
Naalakkersuisut nutaat aningaasaliinissaat pisariaqartinneqarpoq aamma naalakkersuinikkut aatsitassarsiornermut tapersersuinissaq pisariaqartinneqarluni, Nunamineralsimi pisortaq Ole Christiansen oqarpoq.
Tamaaliortoqanngippat aatsitassarsiortitseqatigiiffiit aningaasaliisartullu nunani allaneersut sillimaffigineqartariaqarnerannnik politikkerit innuttaasullu isiginninerannik
Nunaminerals aamma eqqugaasinnaavoq, uffa killormuanik tikilluaqquneqartariaqartut, Nunamineralsimi pisortaq oqarpoq.
Nunarsuarmi aningaasaliisartut suliffeqarfimmut Nunamineralsitut ittunut aningaasaliinissaminnut soqutiginnipput taamaallaalli apeqqutaalerpoq Kalaallit Nunaanni politikkerit nunat allamiut aningaasaliinissaannut isumalluarnarnerusumik pissusseqarfiginissaat taava aallarteqqissinnaagaluarpugut , tamannali angumerisinnaaneripput apeqqutaaginnalerpoq,
Ole Christiansen oqarpoq.
- Piffissaq sivisunerusoq eqqarsaatigalugu angorusupparput, nunani allani aningaasaliisartut peqataatillugit Nunamineralsimi aktiekapitalip annertusinissaanut suliaqarnissamut, taannalu toraarlugu siunnerusuppugut , kisianni soorunalimi takussavarput siunissarput qanoq issanersoq, Ole Christiansen oqarpoq.
Nunamineralsip ingerlanneqarnerani aningaasaliisartut namminersortut aningaasaliinerisigut annerusumik ingerlanneqarpoq.
Namminersorlutik Oqartussat millioninik amerlasuunik Nunamineralsimut aningaasaliisimagaluartoq, Nunatta karsiata aningaasaliissutaasa tallimariaataat aningaasaliisartut namminersortunit pissarsiarineqarpuq.
Namminersorlutik Oqartussat Nunamineralsip piginneqataassutaasa annersaanik piginnittuuvoq
aamma Kalaallit Nunaanni aatsitassanik misissueqqissaarnerup ingerlanneqarnerannik akisussaaffiup annersaa tigummillugu. Nunaminerals nunatsinni aatsitassarsiorluni suliaqarnermi ukiormanna suliaqarnerpaavoq, qillerinerit amerlanerit ingerlanneqarmata.
Nunamineralsip pisortaata Ole Christiansenip neriuutigaa, Naalakkersuisunngortussat Nunamineralsimut amerlanerusunik aningaasaliinissamut piumassuseqassasut, Naalakkersuisutut ulluni tulliuttuni ivertinneqariarunik